garm lahu ka sona bhi hai sarson ki ujyali mein

garm lahū kā sonā bhī hai sarsoñ kī ujyālī meñ

dhuup kī jot jagāne vaale sūraj ghol piyālī meñ

ek sarāpā mahrūmī kā naqsha tū ne khīñch diyā

talḳhī kī zahrāb chamak bhī hai kuchh chashm-e-savālī meñ

rishta bhī hai nashv-o-numā kā farq bhī raushan lamhoñ kā

sabz sarāpā shāḳh-e-badan aur jañgal kī hariyālī meñ

larzish bhī hai sat.h-e-falak par gardish karte sitāroñ kī

vaqt kā ik Thahrāo bhī hai is aurañg-ḳhayālī meñ

shola-dar-shola surḳhī kī maujoñ ko tah-dār banā

vo jo ik gahrā.ī sī hai rañg-e-shafaq kī laalī meñ

āhista āhista ik ik buuñd falak se Tapkī hai

khīñch ik sannāTe kī fazā bhī shabnam kī ujyālī meñ

'zeb' na bin naqqāl-e-ā.īna jītī-jāgtī āñhkeñ khol

apnā zehn utaar ke rakh de rañgoñ kī is thālī meñ

garm lahu ka sona bhi hai sarson ki ujyali mein

dhup ki jot jagane wale suraj ghol piyali mein

ek sarapa mahrumi ka naqsha tu ne khinch diya

talKHi ki zahrab chamak bhi hai kuchh chashm-e-sawali mein

rishta bhi hai nashw-o-numa ka farq bhi raushan lamhon ka

sabz sarapa shaKH-e-badan aur jangal ki hariyali mein

larzish bhi hai sath-e-falak par gardish karte sitaron ki

waqt ka ek Thahrao bhi hai is aurang-KHayali mein

shola-dar-shola surKHi ki maujon ko tah-dar bana

wo jo ek gahrai si hai rang-e-shafaq ki lali mein

aahista aahista ek ek bund falak se Tapki hai

khinch ek sannaTe ki faza bhi shabnam ki ujyali mein

'zeb' na bin naqqal-e-aina jiti-jagti aanhken khol

apna zehn utar ke rakh de rangon ki is thaali mein