garmi-e-bazm hai ek raqs-e-sharar hone tak

garmī-e-bazm hai ik raqs-e-sharar hone tak

chain se baiTheñ vo aahoñ meñ asar hone tak

zabt kartī thī mirī be-ḳhudī-e-shauq kahīñ

pahuñchā manzil pe maiñ sāmān-e-safar hone tak

vaj.h-e-taskīñ hai ye mujh ko shab-e-tanhā.ī meñ

bāteñ kartā huuñ tire ġham se sahar hone tak

kitnā barbād kare dekhiye ye shauq-e-faroġh

ḳhaak ke zarroñ ko ham-rang-e-sharar hone tak

ab to aatā hai mujhe apnī hañsī par ronā

aarzū hañsne kī thī chashm ke tar hone tak

kisī pahlū nahīñ miltā shab-e-ġham dil ko sukūñ

ek hālat se taḌaptā huuñ sahar hone tak

bas-ki hai jalva-e-duniyā sabab-e-marg-e-nigāh

chāhiye qat-e-nazar zauq-e-nazar hone tak

kaash ban jaa.eñ ye nuqte varaq-e-hastī ke

ashk-e-ġham dāman-e-rangīñ pe guhar hone tak

ab to har zarra ik ā.īna-e-irfāñ hai mujhe

thī ye sab be-ḳhabarī apnī ḳhabar hone tak

vo jafā-dost huuñ miltī nahīñ rāhat mujh ko

vaqf-e-teġh-e-nigah-o-tīr-e-nazar hone tak

kitnā pur-kaif hai jazbāt meñ Duubā honā

kyoñ farishta banūñ duniyā meñ bashar hone tak

tirā dil bhī hai ajab fikr-farāmosh 'junūñ'

miT ga.e raat ke sab ranj sahar hone tak

garmi-e-bazm hai ek raqs-e-sharar hone tak

chain se baiThen wo aahon mein asar hone tak

zabt karti thi meri be-KHudi-e-shauq kahin

pahuncha manzil pe main saman-e-safar hone tak

wajh-e-taskin hai ye mujh ko shab-e-tanhai mein

baaten karta hun tere gham se sahar hone tak

kitna barbaad kare dekhiye ye shauq-e-farogh

KHak ke zarron ko ham-rang-e-sharar hone tak

ab to aata hai mujhe apni hansi par rona

aarzu hansne ki thi chashm ke tar hone tak

kisi pahlu nahin milta shab-e-gham dil ko sukun

ek haalat se taDapta hun sahar hone tak

bas-ki hai jalwa-e-duniya sabab-e-marg-e-nigah

chahiye qat-e-nazar zauq-e-nazar hone tak

kash ban jaen ye nuqte waraq-e-hasti ke

ashk-e-gham daman-e-rangin pe guhar hone tak

ab to har zarra ek aaina-e-irfan hai mujhe

thi ye sab be-KHabari apni KHabar hone tak

wo jafa-dost hun milti nahin rahat mujh ko

waqf-e-tegh-e-nigah-o-tir-e-nazar hone tak

kitna pur-kaif hai jazbaat mein Duba hona

kyon farishta banun duniya mein bashar hone tak

tera dil bhi hai ajab fikr-faramosh 'junun'

miT gae raat ke sab ranj sahar hone tak