gauhar-e-nayab ko kahta hai patthar aadmi

gauhar-e-nāyāb ko kahtā hai patthar aadmī

pattharoñ ko kahtā hai nāyāb gauhar aadmī

tum karo ye faisla kab us se milnā chāhiye

din meñ khiltā phuul hai shab meñ hai ḳhanjar aadmī

mere chehre ko ba-ḳhūbī raaz ye ma.alūm hai

aadmī kab aa.ina hai kab hai patthar aadmī

apnī āñkheñ band karke kartā hai jab bhī safar

rāste meñ khātā hai Thokar pe Thokar aadmī

ḳhabt kā gahrā samundar sabr kā ūñchā pahāḌ

aañkh meñ rakhtā hai kaisā kaisā manzar aadmī

jab jalātā hai ġharīboñ ko sitam kī aag meñ

us ghaḌī hotā hai sūraj ke barābar aadmī

aage hai daldal kī bastī pīchhe hai shahr-e-sharar

chhoḌ kar āḳhir kidhar jaa.e samundar aadmī

aane vaalā hai koī tūfān bahr-e-vaqt meñ

apnī apnī naav kā ban jaa.e langar aadmī

āsmāñ kī vus.atoñ se pūchh le jā kar 'qamar'

kab dikhā.ī detā hai gahrā samundar aadmī

gauhar-e-nayab ko kahta hai patthar aadmi

pattharon ko kahta hai nayab gauhar aadmi

tum karo ye faisla kab us se milna chahiye

din mein khilta phul hai shab mein hai KHanjar aadmi

mere chehre ko ba-KHubi raaz ye malum hai

aadmi kab aaina hai kab hai patthar aadmi

apni aankhen band karke karta hai jab bhi safar

raste mein khata hai Thokar pe Thokar aadmi

KHabt ka gahra samundar sabr ka uncha pahaD

aankh mein rakhta hai kaisa kaisa manzar aadmi

jab jalata hai gharibon ko sitam ki aag mein

us ghaDi hota hai suraj ke barabar aadmi

aage hai daldal ki basti pichhe hai shahr-e-sharar

chhoD kar aaKHir kidhar jae samundar aadmi

aane wala hai koi tufan bahr-e-waqt mein

apni apni naw ka ban jae langar aadmi

aasman ki wusaton se puchh le ja kar 'qamar'

kab dikhai deta hai gahra samundar aadmi