gawain hathon se tumne apne wo chahaten ab nahin milengi

gavā.īñ hāthoñ se tum ne apne vo chāhateñ ab nahīñ mileñgī

qasam hai āġhosh-e-gum-shuda kī vo ulfateñ ab nahīñ mileñgī

dayār-e-maġhrib meñ aa base ho yahāñ pe mashriq ko DhūñDte ho

jhalak ho sharm-o-hayā kī jin meñ vo ne'mateñ ab nahīñ mileñgī

mafād thā jo 'azīz tum ko sabhī se rishta hī toḌ baiThe

jo apne hāthoñ se kho chuke vo mohabbateñ ab nahīñ mileñgī

buland-o-bālā 'imāratoñ meñ jo DhūñDte ho sukūn-e-dil ko

muhayyā chhoTe makāñ meñ thiiñ jo vo rāhateñ ab nahīñ mileñgī

khulī khulī thiiñ diloñ kī rāheñ sabhī diloñ meñ bahut jagah thī

banī haiñ mazbūt sarhadeñ so vo qurbateñ ab nahīñ mileñgī

dikhā chuke ho bahut hī ġhussa bahut ziyāda manā chukī maiñ

qadam qadam par vo pahlī 'shamsa' vazāhateñ ab nahīñ mileñgī

gawain hathon se tum ne apne wo chahaten ab nahin milengi

qasam hai aaghosh-e-gum-shuda ki wo ulfaten ab nahin milengi

dayar-e-maghrib mein aa base ho yahan pe mashriq ko DhunDte ho

jhalak ho sharm-o-haya ki jin mein wo ne'maten ab nahin milengi

mafad tha jo 'aziz tum ko sabhi se rishta hi toD baiThe

jo apne hathon se kho chuke wo mohabbaten ab nahin milengi

buland-o-baala 'imaraton mein jo DhunDte ho sukun-e-dil ko

muhayya chhoTe makan mein thin jo wo rahaten ab nahin milengi

khuli khuli thin dilon ki rahen sabhi dilon mein bahut jagah thi

bani hain mazbut sarhaden so wo qurbaten ab nahin milengi

dikha chuke ho bahut hi ghussa bahut ziyaada mana chuki main

qadam qadam par wo pahli 'shamsa' wazahaten ab nahin milengi