gaya wo chhoD kar kamre hamare

gayā vo chhoḌ kar kamre hamāre

so ab haiñ band darvāze hamāre

vo har qīmat pe ham ko chāhtā hai

use manzūr haiñ naḳhre hamāre

vo jis ke vāste pahne the ham ne

pasand aa.e use kapḌe hamāre

bichhaḌ kar tujh se ġhazloñ se hue haiñ

marāsim aur bhī gahre hamāre

hamārī pagḌiyāñ tak bik chukī haiñ

magar utre nahīñ nashshe hamāre

kabhī to naam chaltā thā hamārā

ki ab chalte nahīñ sikke hamāre

ġhazal ke sher sab achchhe nahīñ haiñ

magar achchhe haiñ kuchh misre hamāre

tumhāre ahd bhī sachche kahāñ the

chalo jhūTe the kuchh va.ade hamāre

ham apne gaañv ke majnūñ haiñ 'shādāb'

bahut mash.hūr haiñ qisse hamāre

gaya wo chhoD kar kamre hamare

so ab hain band darwaze hamare

wo har qimat pe hum ko chahta hai

use manzur hain naKHre hamare

wo jis ke waste pahne the hum ne

pasand aae use kapDe hamare

bichhaD kar tujh se ghazlon se hue hain

marasim aur bhi gahre hamare

hamari pagDiyan tak bik chuki hain

magar utre nahin nashshe hamare

kabhi to nam chalta tha hamara

ki ab chalte nahin sikke hamare

ghazal ke sher sab achchhe nahin hain

magar achchhe hain kuchh misre hamare

tumhaare ahd bhi sachche kahan the

chalo jhuTe the kuchh wade hamare

hum apne ganw ke majnun hain 'shadab'

bahut mashhur hain qisse hamare