ghazab hai muddai jo ho wahi phir muddaa Thahre

ġhazab hai mudda.ī jo ho vahī phir mudda.ā Thahre

jo apnā dushman-e-dil ho vahī dil kī davā Thahre

vo chāheñ jis qadar jaur-o-jafā ham par kareñ lekin

hameñ taslīm lāzim hai ki pāband-e-razā Thahre

ye duniyā ik sarā hai is ko āḳhir chhoḌ jaanā hai

agar do-chār din aakar yahāñ Thahre to kyā Thahre

kaTe haiñ sar bahut teġh-e-jafā se be-gunāhī ke

ajab kyā hai agar qātil kā kūcha karbalā Thahre

idhar aane ko haiñ vo aur udhar vaqt-e-safar aaya

ajab mushkil na vo aa.eñ na dam-bhar ko qazā Thahre

usī ko zindagī kā lutf hai is dahr-e-fānī meñ

ki jo nazdīk achchhoñ ke bhalā aur bā-ḳhudā Thahre

qiyām apnā ho is mehnat-sarā-e-dahr meñ kyūñkar

jahāñ aafat hī aafat ho vahāñ 'ārām' kyā Thahre

ghazab hai muddai jo ho wahi phir muddaa Thahre

jo apna dushman-e-dil ho wahi dil ki dawa Thahre

wo chahen jis qadar jaur-o-jafa hum par karen lekin

hamein taslim lazim hai ki paband-e-raza Thahre

ye duniya ek sara hai is ko aaKHir chhoD jaana hai

agar do-chaar din aakar yahan Thahre to kya Thahre

kaTe hain sar bahut tegh-e-jafa se be-gunahi ke

ajab kya hai agar qatil ka kucha karbala Thahre

idhar aane ko hain wo aur udhar waqt-e-safar aaya

ajab mushkil na wo aaen na dam-bhar ko qaza Thahre

usi ko zindagi ka lutf hai is dahr-e-fani mein

ki jo nazdik achchhon ke bhala aur ba-KHuda Thahre

qiyam apna ho is mehnat-sara-e-dahr mein kyunkar

jahan aafat hi aafat ho wahan 'aram' kya Thahre