ghazab hain piTte jhallate peDon mein jo ye lahraati gati Tahniyan hain

ġhazab haiñ pīTte jhallāte peḌoñ meñ jo ye lahrātī gaatī Tahniyāñ haiñ

sarāsar ye janāb-e-jhunD kī tinkā-sarā.ī hai ham achchhī Tahniyāñ haiñ

sakhī jaisā nasība hai parā.ī god kī tash.hīr se to ye saphal hai

bahan mālan ke darvāze pe laTkī asl meñ pairoñ meñ bikhrī Tahniyāñ haiñ

bahut pahuñche hue kaḌiyal tane ko ḳhvāb meñ shāyad lakaḌhārā dikhā hai

harāaval kī jaḌoñ ke saañs ukhaḌte jā rahe haiñ sahmī sahmī Tahniyāñ haiñ

bagūloñ kī ḳhabar par Doltī Daalī ne ik gunjān Tahnī se kahā thā

ḳhudā rakkhe shagūfoñ koñpaloñ se to pareshān aaj saarī Tahniyāñ haiñ

hare hāthoñ pe shajre phuul uThātī aur ḳhizāñ kī jholiyoñ meñ phal girātī

ye hazrat TunD kī gustāḳh haiñ ye 'āqibat ko bhuul baiThī Tahniyāñ haiñ

buzurgo bhā.iyo bahno bhale jitnā lachak leñ yā chaTak leñ yā mahak leñ

sabhī ātish-kade kī jhoñk haiñ koī tanāvar haiñ ki chhoTī Tahniyāñ haiñ

hameñ pākīza shajroñ kī numū-yābī ke khāte meñ kahīñ likkhā na jaa.e

ham apne barguzīda bargadoñ ke hāshiyoñ se bāhar aa.ī Tahniyāñ haiñ

ghazab hain piTte jhallate peDon mein jo ye lahraati gati Tahniyan hain

sarasar ye janab-e-jhunD ki tinka-sarai hai hum achchhi Tahniyan hain

sakhi jaisa nasiba hai parai god ki tashhir se to ye saphal hai

bahan malan ke darwaze pe laTki asl mein pairon mein bikhri Tahniyan hain

bahut pahunche hue kaDiyal tane ko KHwab mein shayad lakaDhaara dikha hai

haraawal ki jaDon ke sans ukhaDte ja rahe hain sahmi sahmi Tahniyan hain

bagulon ki KHabar par Dolti Dali ne ek gunjaan Tahni se kaha tha

KHuda rakkhe shagufon konpalon se to pareshan aaj sari Tahniyan hain

hare hathon pe shajre phul uThati aur KHizan ki jholiyon mein phal giraati

ye hazrat TunD ki gustaKH hain ye 'aqibat ko bhul baiThi Tahniyan hain

buzurgo bhaiyo bahno bhale jitna lachak len ya chaTak len ya mahak len

sabhi aatish-kade ki jhonk hain koi tanawar hain ki chhoTi Tahniyan hain

hamein pakiza shajron ki numu-yabi ke khate mein kahin likkha na jae

hum apne barguzida bargadon ke hashiyon se bahar aai Tahniyan hain