ghazab ka shahr hai sab ko udas rakhta hai

ġhazab kā shahr hai sab ko udaas rakhtā hai

par is meñ har koī basne kī aas rakhtā hai

jahāñ ke taur-tarīqe samajh bhī saktā huuñ

tirā ḳhayāl mujhe nā-shanās rakhtā hai

rakhā hai duur bahut dard ko davāoñ se

charāġh kaun havāoñ ke paas rakhtā hai

ye jism-o-jān to duniyā ke kaam aa.e haiñ

ab āsmāñ mirī sāñsoñ kī aas rakhtā hai

riyā tū jis ko samajhtā hai vo hayā hai yahāñ

ki sach bhī jhuuT kā ḳhud par libās rakhtā hai

vo ḳhud ko rind bhī kahtā hai aur zāhid bhī

vo apne haath meñ ḳhālī gilās rakhtā hai

lihāz apnī hī ġhairat kā hai kise 'zarra'

aur ek tū hai jo ġhairoñ kā paas rakhtā hai

ghazab ka shahr hai sab ko udas rakhta hai

par is mein har koi basne ki aas rakhta hai

jahan ke taur-tariqe samajh bhi sakta hun

tera KHayal mujhe na-shanas rakhta hai

rakha hai dur bahut dard ko dawaon se

charagh kaun hawaon ke pas rakhta hai

ye jism-o-jaan to duniya ke kaam aae hain

ab aasman meri sanson ki aas rakhta hai

riya tu jis ko samajhta hai wo haya hai yahan

ki sach bhi jhuT ka KHud par libas rakhta hai

wo KHud ko rind bhi kahta hai aur zahid bhi

wo apne hath mein KHali gilas rakhta hai

lihaz apni hi ghairat ka hai kise 'zarra'

aur ek tu hai jo ghairon ka pas rakhta hai