ghazal chheDi hai nasir kya hua hai

ġhazal chheḌī hai 'nāsir' kyā huā hai

purānā zaḳhm phir taaza huā hai

tumheñ bhī dil-lagī mahñgī paḌī hai

mujhe bhī pyaar meñ ghāTā huā hai

zarā zulfoñ ko bal de de sitamgar

tirī zulfoñ meñ dil uljhā huā hai

tirī qismat meñ maiñ huuñ yā nahīñ huuñ

mirī kunDlī meñ tū baiThā huā hai

gul-o-bulbul ke saste chochaloñ meñ

hamesha bāġhbāñ rusvā huā hai

mirā rahbar na ban unglī pakaḌ le

tū mere sāmne paidā huā hai

mirā dil ḳhud mirā apnā nahīñ hai

mujhe to pyaar bhī jhūTā huā hai

mujhe sab dekhne kyoñ aa rahe haiñ

zarā maiñ bhī to dekhūñ kyā huā hai

tumhārā dil hamāre paas achchhā

uThā lo mez par rakkhā huā hai

kahīñ mil jaa.e 'nāsir' to batānā

use dekhe hue 'arsa huā hai

ghazal chheDi hai 'nasir' kya hua hai

purana zaKHm phir taza hua hai

tumhein bhi dil-lagi mahngi paDi hai

mujhe bhi pyar mein ghaTa hua hai

zara zulfon ko bal de de sitamgar

teri zulfon mein dil uljha hua hai

teri qismat mein main hun ya nahin hun

meri kunDli mein tu baiTha hua hai

gul-o-bulbul ke saste chochalon mein

hamesha baghban ruswa hua hai

mera rahbar na ban ungli pakaD le

tu mere samne paida hua hai

mera dil KHud mera apna nahin hai

mujhe to pyar bhi jhuTa hua hai

mujhe sab dekhne kyon aa rahe hain

zara main bhi to dekhun kya hua hai

tumhaara dil hamare pas achchha

uTha lo mez par rakkha hua hai

kahin mil jae 'nasir' to batana

use dekhe hue 'arsa hua hai