ghazal ka partaw nai zaminon se ja mila hai

ġhazal kā partav na.ī zamīnoñ se jā milā hai

patā chalā hai suḳhan ḳhazīnoñ se jā milā hai

munāfiqoñ ko sarāhtā huuñ munāfiqat se

sharīf shā.ir bhī ab kamīnoñ se jā milā hai

isī liye to maiñ ishq se pīchhe haT rahā huuñ

ye silsila bhī tamāsh-bīnoñ se jā milā hai

sarāhne lag gayā junūñ har kisī ko sāhab

ye vo makāñ hai jo ḳhud makīnoñ se jā milā hai

visāl-rut ne sabhī ko khīñchā hai apnī jānib

hamārā dil bhī ka.ī hasīnoñ se jā milā hai

bachā rahā thā maiñ be-vafāoñ se ishq 'mannān'

magar ye sajda unhīñ jabīnoñ se jā milā hai

ghazal ka partaw nai zaminon se ja mila hai

pata chala hai suKHan KHazinon se ja mila hai

munafiqon ko sarahta hun munafiqat se

sharif shair bhi ab kaminon se ja mila hai

isi liye to main ishq se pichhe haT raha hun

ye silsila bhi tamash-binon se ja mila hai

sarahne lag gaya junun har kisi ko sahab

ye wo makan hai jo KHud makinon se ja mila hai

visal-rut ne sabhi ko khincha hai apni jaanib

hamara dil bhi kai hasinon se ja mila hai

bacha raha tha main be-wafaon se ishq 'mannan'

magar ye sajda unhin jabinon se ja mila hai