ghazal kahi hai hadis-e-gham-e-jahan ki tarah

ġhazal kahī hai hadīs-e-ġham-e-jahāñ kī tarah

suneñge log ise apnī dāstāñ kī tarah

fareb detā huuñ duniyā ko inkisārī kā

maiñ apne aap meñ phailā huuñ āsmāñ kī tarah

qadam qadam pe ziyā-bāriyāñ ma.āz-allāh

ye rahguzar hai ki phailī hai kahkashāñ kī tarah

ye gul to gul haiñ chaman ko na bech deñ zālim

jo ruup apnā banā.e haiñ bāġhbāñ kī tarah

zarūr sāzish-e-kalak-e-azal thī kuchh is meñ

paḌā huuñ ek taraf harf-e-rā.egāñ kī tarah

kahāñ thā merā nasheman maiñ sab se pūchh aayā

kisī kā ghar na jale mere āshiyāñ kī tarah

TaTol lenā zarā un kī āstīneñ bhī

jo tum se haath milāte haiñ rāz-dāñ kī tarah

vo jin kā rāz-e-mohabbat thā be-niyāz hue

ham un kā raaz chhupā.e haiñ apnī jaañ kī tarah

koī to jaan pe khele hai ban ke parvāna

jalā kare hai koī sham.a-e-be-zabāñ kī tarah

mile to qāfile sau sau shikasta-pā the hamīñ

uTh uTh ke baiTh ga.e gard-e-kārvāñ kī tarah

ghazal kahi hai hadis-e-gham-e-jahan ki tarah

sunenge log ise apni dastan ki tarah

fareb deta hun duniya ko inkisari ka

main apne aap mein phaila hun aasman ki tarah

qadam qadam pe ziya-bariyan maaz-allah

ye rahguzar hai ki phaili hai kahkashan ki tarah

ye gul to gul hain chaman ko na bech den zalim

jo rup apna banae hain baghban ki tarah

zarur sazish-e-kalak-e-azal thi kuchh is mein

paDa hun ek taraf harf-e-raegan ki tarah

kahan tha mera nasheman main sab se puchh aaya

kisi ka ghar na jale mere aashiyan ki tarah

TaTol lena zara un ki aastinen bhi

jo tum se hath milate hain raaz-dan ki tarah

wo jin ka raaz-e-mohabbat tha be-niyaz hue

hum un ka raaz chhupae hain apni jaan ki tarah

koi to jaan pe khele hai ban ke parwana

jala kare hai koi shama-e-be-zaban ki tarah

mile to qafile sau sau shikasta-pa the hamin

uTh uTh ke baiTh gae gard-e-karwan ki tarah