ghazal ki samt is jaanib se bhi rasta nikalenge

ġhazal kī samt is jānib se bhī rasta nikāleñge

tumhārī guftugū se ham koī misra' nikāleñge

hameñ daftar meñ aa kar bhī yahī mahsūs hotā hai

abhī schōl lag jā.egā aur basta nikāleñge

tumhārī aañkh se tinkā nikālā jā.egā pahle

ham is ke baa'd apne pair se kāñTā nikāleñge

jinheñ tum qahqahoñ aur tāliyoñ se daad dete ho

tamāshā ḳhatm hone par yahī kaasa nikāleñge

mohabbat kā ye pahnāvā hamāre tan pe sajnā hai

ham is kurte kī kaf se fāltū dhāga nikāleñge

tumhārī faizyābī kī sabīleñ lag ga.iiñ 'faisal'

jinheñ khiḌkī kī hājat thī vo darvāza nikāleñge

ghazal ki samt is jaanib se bhi rasta nikalenge

tumhaari guftugu se hum koi misra' nikalenge

hamein daftar mein aa kar bhi yahi mahsus hota hai

abhi school lag jaega aur basta nikalenge

tumhaari aankh se tinka nikala jaega pahle

hum is ke ba'd apne pair se kanTa nikalenge

jinhen tum qahqahon aur taliyon se dad dete ho

tamasha KHatm hone par yahi kasa nikalenge

mohabbat ka ye pahnawa hamare tan pe sajna hai

hum is kurte ki kaf se faltu dhaga nikalenge

tumhaari faizyabi ki sabilen lag gain 'faisal'

jinhen khiDki ki hajat thi wo darwaza nikalenge