ghazal mein dard ka jadu mujhi ko hona tha

ġhazal meñ dard kā jaadū mujhī ko honā thā

ki dasht-e-ishq meñ baahū mujhī ko honā thā

use to chāñd bhī bechārgī meñ chhoḌ gayā

añdherī raat kā jugnū mujhī ko honā thā

zarā sī baat pe ye jog kaun letā hai

tumhāre pyaar meñ sādhū mujhī ko honā thā

badan ke aur havāle to sab salāmat the

magar kaTā huā baazū mujhī ko honā thā

kisī kā karb mirī zaat se umaDtā hai

kisī kī aañkh kā aañsū mujhī ko honā thā

maiñ ism rakhtā huuñ yaarī meñ ġham-gusārī meñ

har ek zaḳhm kā daarū mujhī ko honā thā

gharoñ ko chhoḌ ke sab hoshiyār kahlā.eñ

vatan kī miTTī kā mādho mujhī ko honā thā

ye apnī apnī tabī.at kī baat hai 'sāqib'

use jo phuul to ḳhushbū mujhī ko honā thā

ghazal mein dard ka jadu mujhi ko hona tha

ki dasht-e-ishq mein bahu mujhi ko hona tha

use to chand bhi bechaargi mein chhoD gaya

andheri raat ka jugnu mujhi ko hona tha

zara si baat pe ye jog kaun leta hai

tumhaare pyar mein sadhu mujhi ko hona tha

badan ke aur hawale to sab salamat the

magar kaTa hua bazu mujhi ko hona tha

kisi ka karb meri zat se umaDta hai

kisi ki aankh ka aansu mujhi ko hona tha

main ism rakhta hun yari mein gham-gusari mein

har ek zaKHm ka daru mujhi ko hona tha

gharon ko chhoD ke sab hoshiyar kahlaen

watan ki miTTi ka madho mujhi ko hona tha

ye apni apni tabiat ki baat hai 'saqib'

use jo phul to KHushbu mujhi ko hona tha