ghazal meri bhi ab aksar rawani chhoD deti hai

ġhazal merī bhī ab aksar ravānī chhoḌ detī hai

mire pannoñ pe ye terī nishānī chhoḌ detī hai

hameñ maujūd rakhte haiñ hamāre lafz logoñ meñ

ye kaayā ḳhaak ho jaatī zabānī chhoḌ detī hai

javānī ke nashe meñ tū zarā ye dhyān meñ rakhnā

ye chehre kī chamak ik din javānī chhoḌ detī hai

adā tere takallum kī bahut dilkash hai merī jaañ

mire adhroñ pe ye terī kahānī chhoḌ detī hai

use mohtāt rakhtā hai tujhe khone kā Dar har pal

tabhī to phir yaqīñ karnā dīvānī chhoḌ detī hai

bahut mujh ko hañsātī hai tumhārī yaad aksar hī

yahī aksar mirī āñkhoñ meñ paanī chhoḌ detī hai

use yāroñ mire ash.ār jaane kyoñ nahīñ bhāte

jo uulā Thiik se paḌh le to saanī chhoḌ detī hai

ghazal meri bhi ab aksar rawani chhoD deti hai

mere pannon pe ye teri nishani chhoD deti hai

hamein maujud rakhte hain hamare lafz logon mein

ye kaya KHak ho jati zabani chhoD deti hai

jawani ke nashe mein tu zara ye dhyan mein rakhna

ye chehre ki chamak ek din jawani chhoD deti hai

ada tere takallum ki bahut dilkash hai meri jaan

mere adhron pe ye teri kahani chhoD deti hai

use mohtat rakhta hai tujhe khone ka Dar har pal

tabhi to phir yaqin karna diwani chhoD deti hai

bahut mujh ko hansati hai tumhaari yaad aksar hi

yahi aksar meri aankhon mein pani chhoD deti hai

use yaron mere ashaar jaane kyon nahin bhate

jo ula Thik se paDh le to sani chhoD deti hai