ghazal ye maine tere waste kahi hui hai

ġhazal ye maiñ ne tire vāste kahī huī hai

ye vo ġhazal hai jo taaza abhī abhī huī hai

rumūz-e-zindagī se go mujh ko āgahī huī hai

shu'ūr pā ke to āzār zindagī huī hai

chalī hai aisī qayāmat kī chaal qismat ne

mujhe to mere hī apnoñ ne maat dī huī hai

zamāne ne vo qayāmat kī chaal ab ke chalī

mirī kahānī bahut der se rukī huī hai

jo talḳhiyāñ sahīñ parda haTā nigāhoñ se ik

huā na harj koī ḳhud se āgahī huī hai

palaT ke dekh to safhāt zindagī ke kabhī

kahānī ek mohabbat kī bas likhī huī hai

vo dūsroñ ko jo insāniyat kā dete haiñ dars

'ajab hai un meñ isī chiiz kī kamī huī hai

le 'shamsa' naam bhī sūraj se mil rahā hai tirā

tire vujūd se duniyā meñ raushnī huī hai

ghazal ye main ne tere waste kahi hui hai

ye wo ghazal hai jo taza abhi abhi hui hai

rumuz-e-zindagi se go mujh ko aagahi hui hai

shu'ur pa ke to aazar zindagi hui hai

chali hai aisi qayamat ki chaal qismat ne

mujhe to mere hi apnon ne mat di hui hai

zamane ne wo qayamat ki chaal ab ke chali

meri kahani bahut der se ruki hui hai

jo talKHiyan sahin parda haTa nigahon se ek

hua na harj koi KHud se aagahi hui hai

palaT ke dekh to safhat zindagi ke kabhi

kahani ek mohabbat ki bas likhi hui hai

wo dusron ko jo insaniyat ka dete hain dars

'ajab hai un mein isi chiz ki kami hui hai

le 'shamsa' nam bhi suraj se mil raha hai tera

tere wujud se duniya mein raushni hui hai