ghazlon mein koi fikr ka pahlu to nahin hai

ġhazloñ meñ koī fikr kā pahlū to nahīñ hai

āvāz kā jaadū sahī urdu to nahīñ hai

rah rah ke damaktā hai har ik naqsh-e-kaf-e-pā

hamrāh tirī yaad kā jugnū to nahīñ hai

muTThī meñ sahī azmat-e-'nāhīd'-o-'surayyā'

bigḌe hue hālāt pe qaabū to nahīñ hai

kyoñ paanī huā jaatā hai patthar kā kaleja

mauzūa mire sher kā aañsū to nahīñ hai

phir chāñd kī mānind hai hasīñ zaḳhm-e-tamannā

ye mo.ajiza-e-jumbish-e-abrū to nahīñ hai

zinda raho mumkin hai sañvar jaa.e kisī roz

qismat koī un kā ḳham-e-gesū to nahīñ hai

mahke hai baḌī shaan se har zaḳhm jigar kā

be-ghar kahīñ us zulf kī ḳhushbū to nahīñ hai

ghazlon mein koi fikr ka pahlu to nahin hai

aawaz ka jadu sahi urdu to nahin hai

rah rah ke damakta hai har ek naqsh-e-kaf-e-pa

hamrah teri yaad ka jugnu to nahin hai

muTThi mein sahi azmat-e-'nahid'-o-'surayya'

bigDe hue haalat pe qabu to nahin hai

kyon pani hua jata hai patthar ka kaleja

mauzua mere sher ka aansu to nahin hai

phir chand ki manind hai hasin zaKHm-e-tamanna

ye moajiza-e-jumbish-e-abru to nahin hai

zinda raho mumkin hai sanwar jae kisi roz

qismat koi un ka KHam-e-gesu to nahin hai

mahke hai baDi shan se har zaKHm jigar ka

be-ghar kahin us zulf ki KHushbu to nahin hai