gesuon ke asir hain hum bhi

gesuoñ ke asiir haiñ ham bhī

qissa-e-dil-pazīr haiñ ham bhī

husn meñ tum sā gar nahīñ koī

'ishq meñ be-nazīr haiñ ham bhī

misl-e-shīrīñ agar hasīn ho tum

ḳhāliq-e-jūe-e-shīr haiñ ham bhī

us ke hāthoñ meñ jo nahīñ miltī

ek aisī lakīr haiñ ham bhī

chāñd ko dekh kar kahā us ne

rashk-e-badr-e-munīr haiñ ham bhī

be-vafā se koī gila na kiyā

kis qadar bā-zamīr haiñ ham bhī

āñsuoñ ke diye jalāte haiñ

raushnī ke safīr haiñ ham bhī

vo kahīñ bhī hoñ dekh lete haiñ

kitne raushan-zamīr haiñ ham bhī

jis kī nazroñ meñ kuchh nahīñ shāhī

ek aise faqīr haiñ ham bhī

koī ham sā nahīñ zamāne meñ

aap apnī nazīr haiñ ham bhī

paas daulat nahīñ to kyā yaaro

apne dil ke amiir haiñ ham bhī

narm dil haiñ magar 'adū ke liye

ek zahrīlā tiir haiñ ham bhī

muttahid aaj ham nahīñ yaaro

yuuñ jahāñ haiñ haqīr haiñ ham bhī

nazm-e-gulshan badal to sakte haiñ

maslahat ke asiir haiñ ham bhī

she'r pur-dard haiñ 'zafar' apne

is zamāne ke 'mīr' haiñ ham bhī

gesuon ke asir hain hum bhi

qissa-e-dil-pazir hain hum bhi

husn mein tum sa gar nahin koi

'ishq mein be-nazir hain hum bhi

misl-e-shirin agar hasin ho tum

KHaliq-e-jue-e-shir hain hum bhi

us ke hathon mein jo nahin milti

ek aisi lakir hain hum bhi

chand ko dekh kar kaha us ne

rashk-e-badr-e-munir hain hum bhi

be-wafa se koi gila na kiya

kis qadar ba-zamir hain hum bhi

aansuon ke diye jalate hain

raushni ke safir hain hum bhi

wo kahin bhi hon dekh lete hain

kitne raushan-zamir hain hum bhi

jis ki nazron mein kuchh nahin shahi

ek aise faqir hain hum bhi

koi hum sa nahin zamane mein

aap apni nazir hain hum bhi

pas daulat nahin to kya yaro

apne dil ke amir hain hum bhi

narm dil hain magar 'adu ke liye

ek zahrila tir hain hum bhi

muttahid aaj hum nahin yaro

yun jahan hain haqir hain hum bhi

nazm-e-gulshan badal to sakte hain

maslahat ke asir hain hum bhi

she'r pur-dard hain 'zafar' apne

is zamane ke 'mir' hain hum bhi