ghabra ke jaan di ho agar hijr-e-yar mein

ghabrā ke jaan dī ho agar hijr-e-yār meñ

allāh do ghaḌī bhī na de sukh farār meñ

dil ko butoñ ne luuT liyā luuT lene do

kyā daḳhl hai mashiyyat-e-parvardigār meñ

ai dost tum pe martā maiñ jī kar hazār baar

hotī jo maut-o-zīst mire iḳhtiyār meñ

maiñ mar gayā to huuñ magar allah-re intizār

āñkheñ khulī haiñ hasrat-e-dīdār-e-yār meñ

mahshar kā din hai ab to dikhā dījiye jamāl

zinda huā huuñ mar ke isī intizār meñ

ye kah ke ham ne jaan dī qadmoñ pe yaar ke

aane na deñge farq kabhī e'tibār meñ

ghabrā rahā hai der se 'rāfat' hamārā dil

aao chalo bhī sair kareñ kū-e-yār meñ

ghabra ke jaan di ho agar hijr-e-yar mein

allah do ghaDi bhi na de sukh farar mein

dil ko buton ne luT liya luT lene do

kya daKHl hai mashiyyat-e-parwardigar mein

ai dost tum pe marta main ji kar hazar bar

hoti jo maut-o-zist mere iKHtiyar mein

main mar gaya to hun magar allah-re intizar

aankhen khuli hain hasrat-e-didar-e-yar mein

mahshar ka din hai ab to dikha dijiye jamal

zinda hua hun mar ke isi intizar mein

ye kah ke hum ne jaan di qadmon pe yar ke

aane na denge farq kabhi e'tibar mein

ghabra raha hai der se 'rafat' hamara dil

aao chalo bhi sair karen ku-e-yar mein