ghaDi ghaDi nae chehre badal rahe hain hum

ghaḌī ghaḌī na.e chehre badal rahe haiñ ham

na.ī hayāt ke sāñchoñ meñ Dhal rahe haiñ ham

shab-e-sitam ke añdhere meñ sham.a kī mānind

ḳhud apnī aag meñ sadiyoñ se jal rahe haiñ ham

hazār vaqt ke tūfāñ ne Thokareñ mārīñ

magar chaTān kī sūrat aTal rahe haiñ ham

na rāhbar hai koī aur na manziloñ ke nishāñ

na jaane kis ke sahāre pe chal rahe haiñ ham

tamāzat-e-nigah-e-yār kā karishma hai

ki aaj barf kī sūrat pighal rahe haiñ ham

sajāo dār-o-rasan le ke aao zanjīreñ

hudūd-e-sahn-e-chaman se nikal rahe haiñ ham

hameñ talāsh na kiije amal kī duniyā meñ

usuul ban ke kitāboñ meñ pal rahe haiñ ham

ghaDi ghaDi nae chehre badal rahe hain hum

nai hayat ke sanchon mein Dhal rahe hain hum

shab-e-sitam ke andhere mein shama ki manind

KHud apni aag mein sadiyon se jal rahe hain hum

hazar waqt ke tufan ne Thokaren marin

magar chaTan ki surat aTal rahe hain hum

na rahbar hai koi aur na manzilon ke nishan

na jaane kis ke sahaare pe chal rahe hain hum

tamazat-e-nigah-e-yar ka karishma hai

ki aaj barf ki surat pighal rahe hain hum

sajao dar-o-rasan le ke aao zanjiren

hudud-e-sahn-e-chaman se nikal rahe hain hum

hamein talash na kije amal ki duniya mein

usul ban ke kitabon mein pal rahe hain hum