ghar ke pahlu mein khaDa tha jo shajar KHatm hua

ghar ke pahlū meñ khaḌā thā jo shajar ḳhatm huā

ab darīche se havāoñ kā guzar ḳhatm huā

lambī bīmārī ne kal āḳhrī hichkī le lī

zindagī jiit ga.ī maut kā Dar ḳhatm huā

ruuh ko chāhiye aisā koī jismānī paḌāo

jis ko chhūte hī lage aaj safar ḳhatm huā

shaam thī maiñ ne jise vaqt-e-sahar maan liyā

raat ghir aa.ī to nairang-e-nazar ḳhatm huā

muḌ ke jaate hue maiñ ne use dekhā bhī nahīñ

aur jab baa'd meñ ġhusse kā asar ḳhatm huā

ye jo nisbat hai 'ajab shai hai zarā dekheñ bhalā

ek insān gayā saarā nagar ḳhatm huā

ghar ke pahlu mein khaDa tha jo shajar KHatm hua

ab dariche se hawaon ka guzar KHatm hua

lambi bimari ne kal aaKHri hichki le li

zindagi jit gai maut ka Dar KHatm hua

ruh ko chahiye aisa koi jismani paDao

jis ko chhute hi lage aaj safar KHatm hua

sham thi main ne jise waqt-e-sahar man liya

raat ghir aai to nairang-e-nazar KHatm hua

muD ke jate hue main ne use dekha bhi nahin

aur jab ba'd mein ghusse ka asar KHatm hua

ye jo nisbat hai 'ajab shai hai zara dekhen bhala

ek insan gaya sara nagar KHatm hua