ghar ki surat jo bhi ho us par hirasan main nahin

ghar kī sūrat jo bhī ho us par hirāsāñ maiñ nahīñ

dar muqaffal haiñ to dīvāroñ se larzāñ maiñ nahīñ

tujh meñ himmat hai so phir shīshe meñ mujh ko bhī utaar

haañ magar ye jaan le itnā bhī āsāñ maiñ nahīñ

nafratoñ kī tah meñ kitnī chāhateñ haiñ ye to soch

tū gurezāñ ho to ho tujh se gurezāñ maiñ nahīñ

raushnī dil meñ agar ho ik sitāra hī bahut

Dūbte sūraj ke manzar se pareshāñ maiñ nahīñ

maiñ ki apnī zaat meñ sho.ala bhī huuñ shabnam bhī huuñ

phir bhī apne-āp se dast-o-garebāñ maiñ nahīñ

rāste ke pech-o-ḳham mere lahū kī taak meñ

baḳht ke andhe kueñ meñ pā-ba-jaulāñ maiñ nahīñ

mausamoñ kī dhuup se kajlā gayā chehre kā rañg

aadmī huuñ be-niyām-e-barq-o-tūfāñ maiñ nahīñ

sochtā huuñ kis ḳharābe meñ mujhe laayā gayā

apne hone par ba-har-sūrat pashemāñ maiñ nahīñ

ghar ki surat jo bhi ho us par hirasan main nahin

dar muqaffal hain to diwaron se larzan main nahin

tujh mein himmat hai so phir shishe mein mujh ko bhi utar

han magar ye jaan le itna bhi aasan main nahin

nafraton ki tah mein kitni chahaten hain ye to soch

tu gurezan ho to ho tujh se gurezan main nahin

raushni dil mein agar ho ek sitara hi bahut

Dubte suraj ke manzar se pareshan main nahin

main ki apni zat mein shoala bhi hun shabnam bhi hun

phir bhi apne-ap se dast-o-gareban main nahin

raste ke pech-o-KHam mere lahu ki tak mein

baKHt ke andhe kuen mein pa-ba-jaulan main nahin

mausamon ki dhup se kajla gaya chehre ka rang

aadmi hun be-niyam-e-barq-o-tufan main nahin

sochta hun kis KHarabe mein mujhe laya gaya

apne hone par ba-har-surat pasheman main nahin