ghar ko virana karen aish ki parwa na karen

ghar ko vīrāna kareñ aish kī parvā na kareñ

terī āñkhoñ kā ishāra ho to kyā kyā na kareñ

dast-e-vahshat ho to kyoñ baat junūñ kī jaa.e

jeb-o-dāman haiñ to kyoñ gul kī tamannā na kareñ

aap se merī guzārish hai kyoñ yuuñ shām-o-sahar

merī ḳhvāhish se ziyāda mujhe dekhā na kareñ

kaun dekhe chaman-e-dahr meñ gul kī sūrat

ham agar dīda-e-pur-nam se sañvārā na kareñ

kaise taaza ho tire gesū-e-ḳhamdār kī yaad

ham jo rāh-e-rasan-o-dār se guzrā na kareñ

vo bhī kis dil se suneñ kushta-e-ġham kī rūdād

ham bhī kis muñh se bayāñ dard kā afsāna kareñ

ghar ko virana karen aish ki parwa na karen

teri aankhon ka ishaara ho to kya kya na karen

dast-e-wahshat ho to kyon baat junun ki jae

jeb-o-daman hain to kyon gul ki tamanna na karen

aap se meri guzarish hai kyon yun sham-o-sahar

meri KHwahish se ziyaada mujhe dekha na karen

kaun dekhe chaman-e-dahr mein gul ki surat

hum agar dida-e-pur-nam se sanwara na karen

kaise taza ho tere gesu-e-KHamdar ki yaad

hum jo rah-e-rasan-o-dar se guzra na karen

wo bhi kis dil se sunen kushta-e-gham ki rudad

hum bhi kis munh se bayan dard ka afsana karen