ghar mein chizen aaengi barkat barasti jaegi

ghar meñ chīzeñ ā.eñgī barkat barastī jā.egī

us ke chakkar meñ ye mumkin hai ki hastī jā.egī

minnateñ karte the kab ye tang-dastī jā.egī

kyā pata thā saath meñ vo mauj mastī jā.egī

mujh ko naddī de na paa.ī ek bhī paanī kī buuñd

mujh ko pyāsā rakh ke vo ḳhud bhī tarastī jā.egī

ham ne to be-sāḳhta āġhosh meñ us ko liyā

kyā pata thā zindagī yuuñ ham ko kastī jā.egī

kashmakash meñ hī rahe aur ham kahīñ ke ho na paa.e

haq-parastī jā.egī yā ghar-grihastī jā.egī

mujh talak mahdūd hai merī sadā mā'lūm hai

dekhnā merī ḳhamoshī bastī bastī jā.egī

tujh meñ ḳhūbī hai to 'zarra' muft meñ tū baañT de

bechne jā.egā to ye ḳhuub sastī jā.egī

ghar mein chizen aaengi barkat barasti jaegi

us ke chakkar mein ye mumkin hai ki hasti jaegi

minnaten karte the kab ye tang-dasti jaegi

kya pata tha sath mein wo mauj masti jaegi

mujh ko naddi de na pai ek bhi pani ki bund

mujh ko pyasa rakh ke wo KHud bhi tarasti jaegi

hum ne to be-saKHta aaghosh mein us ko liya

kya pata tha zindagi yun hum ko kasti jaegi

kashmakash mein hi rahe aur hum kahin ke ho na pae

haq-parasti jaegi ya ghar-grihasti jaegi

mujh talak mahdud hai meri sada ma'lum hai

dekhna meri KHamoshi basti basti jaegi

tujh mein KHubi hai to 'zarra' muft mein tu banT de

bechne jaega to ye KHub sasti jaegi