ghar mein daraD Dalte rishton ki KHair ho

ghar meñ darāḌ Dālte rishtoñ kī ḳhair ho

is āstīñ meñ aa base sāñpoñ kī ḳhair ho

vo TūTne lagīñ to suhūlat mujhe bhī hai

shab meñ qarār baḳhshte tāroñ kī ḳhair ho

ye log har qadam pe girāne lage mujhe

lekin sambhāltī tirī bāñhoñ kī ḳhair ho

tū jo nahīñ to phuul to haiñ ās-pās bhī

is habs meñ khile hue ġhunchoñ kī ḳhair ho

ruk sā gayā nadī kā bahāv baras se thā

us meñ dhule hue tire pairoñ kī ḳhair ho

jis samt huuñ ravāñ-davāñ manzil bhī hai vahīñ

rastoñ meñ jā-ba-jā paḌe kāñToñ kī ḳhair ho

maiñ kyā kahūñ ki kitne zamāne guzar ga.e

hisse meñ mere aa.eñ na ḳhushiyoñ kī ḳhair ho

mauj-e-fanā ne dasht meñ lā kar jhaTak diyā

hairat se dekhtī tirī āñkhoñ kī ḳhair ho

ye iztirāb-e-ishq se tohfa milā mujhe

muñh ko chiḌā rahe tire lafzoñ kī ḳhair ho

bāġhoñ meñ sair karte hue jugnuoñ meñ tum

tum se ziyā pakaḌte charāġhoñ kī ḳhair ho

un ke sabab se hī huī maiñ dar se be-amāñ

'an.am' tumhāre haal pe hañstoñ kī ḳhair ho

ghar mein daraD Dalte rishton ki KHair ho

is aastin mein aa base sanpon ki KHair ho

wo TuTne lagin to suhulat mujhe bhi hai

shab mein qarar baKHshte taron ki KHair ho

ye log har qadam pe girane lage mujhe

lekin sambhaalti teri banhon ki KHair ho

tu jo nahin to phul to hain aas-pas bhi

is habs mein khile hue ghunchon ki KHair ho

ruk sa gaya nadi ka bahaw baras se tha

us mein dhule hue tere pairon ki KHair ho

jis samt hun rawan-dawan manzil bhi hai wahin

raston mein ja-ba-ja paDe kanTon ki KHair ho

main kya kahun ki kitne zamane guzar gae

hisse mein mere aaen na KHushiyon ki KHair ho

mauj-e-fana ne dasht mein la kar jhaTak diya

hairat se dekhti teri aankhon ki KHair ho

ye iztirab-e-ishq se tohfa mila mujhe

munh ko chiDa rahe tere lafzon ki KHair ho

baghon mein sair karte hue jugnuon mein tum

tum se ziya pakaDte charaghon ki KHair ho

un ke sabab se hi hui main dar se be-aman

'anam' tumhaare haal pe hanston ki KHair ho