ghar se chiKHen uTh rahi thin aur main jaga na tha

ghar se chīḳheñ uTh rahī thiiñ aur maiñ jaagā na thā

itnī gahrī niiñd to pahle kabhī soyā na thā

nashsha-e-āvārgī jab kam huā to ye khulā

koī bhī rasta mire ghar kī taraf jaatā na thā

kyā gila ik dūsre se bevafā.ī kā kareñ

ham ne hī ik dūsre ko Thiik se samjhā na thā

gul na the jis meñ vo gulshan bhī thā jañgal kī tarah

ghar vo qabristān thā jis meñ koī bachcha na thā

āsmāñ par thā ḳhudā tanhā magar 'ārif-shafīq'

is zamīñ par koī bhī merī tarah tanhā na thā

ghar se chiKHen uTh rahi thin aur main jaga na tha

itni gahri nind to pahle kabhi soya na tha

nashsha-e-awargi jab kam hua to ye khula

koi bhi rasta mere ghar ki taraf jata na tha

kya gila ek dusre se bewafai ka karen

hum ne hi ek dusre ko Thik se samjha na tha

gul na the jis mein wo gulshan bhi tha jangal ki tarah

ghar wo qabristan tha jis mein koi bachcha na tha

aasman par tha KHuda tanha magar 'arif-shafiq'

is zamin par koi bhi meri tarah tanha na tha