ghar se daftar aur phir daftar se ghar kafi hai kya

ghar se daftar aur phir daftar se ghar kaafī hai kyā

zindagī tū hī batā itnā safar kaafī hai kyā

kaun samjhegā mirī tanhā.iyoñ ke mas.ale

hai zamāna yuuñ to mere saath par kaafī hai kyā

āj-kal mere ta.āqub meñ haiñ āñkheñ yaar kī

ibtidā.ī ishq meñ itnā asar kaafī hai kyā

jal ke marnā chāhiye thā garmī-e-iḳhlās meñ

haif dīvāna huā ḳhasta-jigar kaafī hai kyā

husn tujh meñ aur thoḌī dilkashī darkār hai

ātishīñ-abrū qayāmat sī nazar kaafī hai kyā

ishq mere aur tujh ko kyā vazīfa chāhiye

dekh āḳhir ho gayā maiñ dar-ba-dar kaafī hai kyā

phir anāsir ne badal lī sūrat-e-tartīb aur

ālam-e-hastī huā zer-o-zabar kaafī hai kyā

be-dilī se aa.e the ham bhī kabhī sahrāoñ meñ

dil to yaañ lagne lagā apnā magar kaafī hai kyā

haañ kabhī jhuktā na thā ḳhalq-e-ḳhudā ke sāmne

tere sajdoñ meñ jhukā jaatā hai sar kaafī hai kyā

kyā karūñ aisā ki apne dil meñ vo rakh le mujhe

sun 'karan' ye sher-goī kā hunar kaafī hai kyā

ghar se daftar aur phir daftar se ghar kafi hai kya

zindagi tu hi bata itna safar kafi hai kya

kaun samjhega meri tanhaiyon ke masale

hai zamana yun to mere sath par kafi hai kya

aaj-kal mere taaqub mein hain aankhen yar ki

ibtidai ishq mein itna asar kafi hai kya

jal ke marna chahiye tha garmi-e-iKHlas mein

haif diwana hua KHasta-jigar kafi hai kya

husn tujh mein aur thoDi dilkashi darkar hai

aatishin-abru qayamat si nazar kafi hai kya

ishq mere aur tujh ko kya wazifa chahiye

dekh aaKHir ho gaya main dar-ba-dar kafi hai kya

phir anasir ne badal li surat-e-tartib aur

aalam-e-hasti hua zer-o-zabar kafi hai kya

be-dili se aae the hum bhi kabhi sahraon mein

dil to yan lagne laga apna magar kafi hai kya

han kabhi jhukta na tha KHalq-e-KHuda ke samne

tere sajdon mein jhuka jata hai sar kafi hai kya

kya karun aisa ki apne dil mein wo rakh le mujhe

sun 'karan' ye sher-goi ka hunar kafi hai kya