ghar se ghar tak ka rasta na mila

ghar se ghar tak kā rāsta na milā

koī bhī ḳhud meñ jhāñktā na milā

sab ke hamrāh sab ke saa.e the

shahr meñ koī devtā na milā

kitne hoñToñ kā lams yaad rahe

ek bhī naqsh der-pā na milā

raushnī ke safīr lauT ga.e

shahr-dar-shahr rat-jagā na milā

tang thā zaat kā hisār bahut

koī rasta farār kā na milā

kitne aañsū nichoḌ kar dekhe

kho gayā thā jo qahqaha na milā

ham hī the apne ās-pās 'nazar'

raah meñ koī dūsrā na milā

ghar se ghar tak ka rasta na mila

koi bhi KHud mein jhankta na mila

sab ke hamrah sab ke sae the

shahr mein koi dewta na mila

kitne honTon ka lams yaad rahe

ek bhi naqsh der-pa na mila

raushni ke safir lauT gae

shahr-dar-shahr rat-jaga na mila

tang tha zat ka hisar bahut

koi rasta farar ka na mila

kitne aansu nichoD kar dekhe

kho gaya tha jo qahqaha na mila

hum hi the apne aas-pas 'nazar'

rah mein koi dusra na mila