ghar se hamein jaane ki zarurat nahin ab kuchh

ghar se hameñ jaane kī zarūrat nahīñ ab kuchh

bāhar kī havā aa ke batā jaatī hai sab kuchh

kyā tez hai ye mausam-e-bārān-e-suḳhan bhī

labrezī-e-dil kuchh hai navā-ḳhezī-e-lab kuchh

kyā dām-e-fusūñ zinda charāġhoñ ke liye the

andāza-e-shab ham ko huā āḳhir-e-shab kuchh

aam itnā rahā shohra-e-zar shor-e-sarā meñ

kaam aa.ī nahīñ narmī-e-tahzīb-o-nasab kuchh

chup haiñ ki ik āshob-e-malāmat meñ ghire haiñ

aa.e the subuk lahje liye ḳhair-talab kuchh

ik shaḳhs se paimān bahut soch ke bāñdhā

phir ham ne tarāshā nahīñ ranjish kā sabab kuchh

ai zī-hunarāñ tez-ravāñ asr-murīdāñ

ham log duā-go haiñ hamārā bhī adab kuchh

ghar se hamein jaane ki zarurat nahin ab kuchh

bahar ki hawa aa ke bata jati hai sab kuchh

kya tez hai ye mausam-e-baran-e-suKHan bhi

labrezi-e-dil kuchh hai nawa-KHezi-e-lab kuchh

kya dam-e-fusun zinda charaghon ke liye the

andaza-e-shab hum ko hua aaKHir-e-shab kuchh

aam itna raha shohra-e-zar shor-e-sara mein

kaam aai nahin narmi-e-tahzib-o-nasab kuchh

chup hain ki ek aashob-e-malamat mein ghire hain

aae the subuk lahje liye KHair-talab kuchh

ek shaKHs se paiman bahut soch ke bandha

phir hum ne tarasha nahin ranjish ka sabab kuchh

ai zi-hunaran tez-rawan asr-muridan

hum log dua-go hain hamara bhi adab kuchh