ghar se nikal ke aae hain bazar ke liye

ghar se nikal ke aa.e haiñ bāzār ke liye

ye bhīḌ-bhāḌ achchhī hai be-kār ke liye

ham yaar ke liye haiñ na dīdār ke liye

terrace pe aa ke baiThe haiñ aḳhbār ke liye

dil-jūī kar rahā hai bahut der se tabīb

kyā āḳhirī davā hai ye bīmār ke liye

maiñ ne to is dayār meñ sab kuchh luTā diyā

duniyā safar pe jaatī hai ghar-bār ke liye

mere dil-e-tabāh meñ itnī jagah kahāñ

us ne jagah nikālī hai dīvār ke liye

tum ne to maanā jurm kā iqrār kar liyā

lekin mujhe sazā milī inkār ke liye

ai māh-rū umiid kī koī kiran to ho

ham jaise tīrgī ke giraftār ke liye

aisā nahīñ ki shahr meñ āsāniyāñ na huuñ

lekin vo sab haiñ lamha-e-dushvār ke liye

ghar se nikal ke aae hain bazar ke liye

ye bhiD-bhaD achchhi hai be-kar ke liye

hum yar ke liye hain na didar ke liye

terrace pe aa ke baiThe hain aKHbar ke liye

dil-jui kar raha hai bahut der se tabib

kya aaKHiri dawa hai ye bimar ke liye

main ne to is dayar mein sab kuchh luTa diya

duniya safar pe jati hai ghar-bar ke liye

mere dil-e-tabah mein itni jagah kahan

us ne jagah nikali hai diwar ke liye

tum ne to mana jurm ka iqrar kar liya

lekin mujhe saza mili inkar ke liye

ai mah-ru umid ki koi kiran to ho

hum jaise tirgi ke giraftar ke liye

aisa nahin ki shahr mein aasaniyan na hun

lekin wo sab hain lamha-e-dushwar ke liye