ghar se nikle hain kisi zalim ke KHwahan ho ke hum

ghar se nikle haiñ kisī zālim ke ḳhvāhāñ ho ke ham

phir rahe haiñ aap apne dushman-e-jāñ ho ke ham

dekh kar sumbul ko yaad aa.ī jo zulf-e-ambarīñ

misl-e-bū gulshan se nikle haiñ pareshāñ ho ke ham

chashm-e-tar ne dāman-e-sahrā meñ motī bhar diye

josh-e-vahshat meñ uThe the abr-e-naisāñ ho ke ham

chauñk paḌte haiñ vo ruuyā meñ bhī ham ko dekh kar

shāyad aate haiñ nazar ḳhvāb-e-pareshāñ ho ke ham

hausle parvāz ke nikle haiñ mar-miTne ke baad

uḌte phirte haiñ ġhubār-e-kū-e-jānāñ ho ke ham

intihā-e-lāġharī ne kar diyā qissa darāz

jī rahe haiñ maut kī nazroñ se pinhāñ ho ke ham

dekh kar dil TūTtā hai 'shā.eq' anjām-e-habāb

kyā kareñge bahr-e-ālam meñ numāyāñ ho ke ham

ghar se nikle hain kisi zalim ke KHwahan ho ke hum

phir rahe hain aap apne dushman-e-jaan ho ke hum

dekh kar sumbul ko yaad aai jo zulf-e-ambarin

misl-e-bu gulshan se nikle hain pareshan ho ke hum

chashm-e-tar ne daman-e-sahra mein moti bhar diye

josh-e-wahshat mein uThe the abr-e-naisan ho ke hum

chaunk paDte hain wo ruya mein bhi hum ko dekh kar

shayad aate hain nazar KHwab-e-pareshan ho ke hum

hausle parwaz ke nikle hain mar-miTne ke baad

uDte phirte hain ghubar-e-ku-e-jaanan ho ke hum

intiha-e-laghari ne kar diya qissa daraaz

ji rahe hain maut ki nazron se pinhan ho ke hum

dekh kar dil TuTta hai 'shaeq' anjam-e-habab

kya karenge bahr-e-alam mein numayan ho ke hum