gharanon se mohabbat ki fazaen chhin lete hain

gharānoñ se mohabbat kī fazā.eñ chhīn lete haiñ

sitamgar phuul se bachchoñ kī maa.eñ chhīn lete haiñ

hamāre bādshāhoñ ko hai nafrat shor se itnī

ki mazlūmoñ se rone kī sadā.eñ chhīn lete haiñ

kahīñ haiñ kufr ke fatve kahīñ shor-e-malāmat hai

ḳhudā jab log ban jaa.eñ jazā.eñ chhīn lete haiñ

ilāhī terī bastī meñ ye kaise log baste haiñ

saroñ par haath rakhte haiñ ridā.eñ chhīn lete haiñ

kisī muflis kī majbūrī kisī kī bhuuk kā saudā

ḳhudā ke naam par zālim qabā.eñ chhīn lete haiñ

zabān-e-narm se karte haiñ pahle pyaar kī bāteñ

bulā kar paas phir jabran hayā.eñ chhīn lete haiñ

mirī khiḌkī ke aage log uThā dete haiñ dīvāreñ

mire kamre ke hisse kī havā.eñ chhīn lete haiñ

mohabbat Dher par kachre ke har ik jā bilaktī hai

ki tohmat bāñTne vaale vafā.eñ chhīn lete haiñ

batāo kis tarah 'tashna' yahāñ sairāb ho koī

samundar ḳhushk sahrā se ghaTā.eñ chhīn lete haiñ

gharanon se mohabbat ki fazaen chhin lete hain

sitamgar phul se bachchon ki maen chhin lete hain

hamare baadshahon ko hai nafrat shor se itni

ki mazlumon se rone ki sadaen chhin lete hain

kahin hain kufr ke fatwe kahin shor-e-malamat hai

KHuda jab log ban jaen jazaen chhin lete hain

ilahi teri basti mein ye kaise log baste hain

saron par hath rakhte hain ridaen chhin lete hain

kisi muflis ki majburi kisi ki bhuk ka sauda

KHuda ke nam par zalim qabaen chhin lete hain

zaban-e-narm se karte hain pahle pyar ki baaten

bula kar pas phir jabran hayaen chhin lete hain

meri khiDki ke aage log uTha dete hain diwaren

mere kamre ke hisse ki hawaen chhin lete hain

mohabbat Dher par kachre ke har ek ja bilakti hai

ki tohmat banTne wale wafaen chhin lete hain

batao kis tarah 'tashna' yahan sairab ho koi

samundar KHushk sahra se ghaTaen chhin lete hain