ghaTa ki mauj rawan hai siyah baalon mein

ghaTā kī mauj ravāñ hai siyāh bāloñ meñ

shab-e-siyah kā dhuāñ hai siyāh bāloñ meñ

vo aaj chhat pe jo aaya hai khol kar gesū

siyāhī ḳhuub ayaañ hai siyāh bāloñ meñ

koī laToñ ko agar dekh le gumāñ hogā

ki jaise naag javāñ hai siyāh bāloñ meñ

ghulī huī hai fazā meñ latīf sī ḳhushbū

ki jaise itr-e-gulāñ hai siyāh bāloñ meñ

Tapak rahī hai jo zulfoñ se bhīgtī sargam

ḳhumār-e-āb-e-ravāñ hai siyāh bāloñ meñ

zabān-e-shauq ne qisse bahut bayān kiye

magar jo tarz-e-bayāñ hai siyāh bāloñ meñ

mujhe huā hai ye andāza narmagīñ chhū kar

gudāz-e-ishq-e-butāñ hai siyāh bāloñ meñ

ye tīrgī to amāvas meñ bhī nahīñ miltī

shabīh-e-māh-e-nihāñ hai siyāh bāloñ meñ

haiñ kis ke dast-e-muqaddar meñ reshmī saa.e

yaqīn hai na gumāñ hai siyāh bāloñ meñ

har ek ruḳh se mukammal shabāb hai un kā

kamī hī koī kahāñ hai siyāh bāloñ meñ

lipaT gayā hai achānak hī 'āftāb' un se

to sansanī kā samāñ hai siyāh bāloñ meñ

ghaTa ki mauj rawan hai siyah baalon mein

shab-e-siyah ka dhuan hai siyah baalon mein

wo aaj chhat pe jo aaya hai khol kar gesu

siyahi KHub ayan hai siyah baalon mein

koi laTon ko agar dekh le guman hoga

ki jaise nag jawan hai siyah baalon mein

ghuli hui hai faza mein latif si KHushbu

ki jaise itr-e-gulan hai siyah baalon mein

Tapak rahi hai jo zulfon se bhigti sargam

KHumar-e-ab-e-rawan hai siyah baalon mein

zaban-e-shauq ne qisse bahut bayan kiye

magar jo tarz-e-bayan hai siyah baalon mein

mujhe hua hai ye andaza narmagin chhu kar

gudaz-e-ishq-e-butan hai siyah baalon mein

ye tirgi to amawas mein bhi nahin milti

shabih-e-mah-e-nihan hai siyah baalon mein

hain kis ke dast-e-muqaddar mein reshmi sae

yaqin hai na guman hai siyah baalon mein

har ek ruKH se mukammal shabab hai un ka

kami hi koi kahan hai siyah baalon mein

lipaT gaya hai achanak hi 'aftab' un se

to sansani ka saman hai siyah baalon mein