ghaTaen bandh raha tha main husn ki laT mein

ghaTā.eñ bāñdh rahā thā maiñ husn kī laT meñ

pasīne chhūT ga.e she'r kī sajāvaT meñ

sach ek chhoTā sā jumla thā kah diyā hotā

hazār lafz lage jhuuT kī banāvaT meñ

vo kaisā daur thā ham rāhatoñ ke hākim the

tamām raat guzartī thī ek karvaT meñ

jinhoñ ne taash ke pattoñ kā ghar banāyā hai

dikhā.ī detā hai tūfān un ko aahaT meñ

jadīd nasl meñ kitnā utāvlā-pan hai

shajar lagāte hī phal chāhiye faTāfaT meñ

phir is ke baa'd kabhī pyaas bujh nahīñ paa.ī

kisī ne paanī pilāyā thā chhup ke ghūñghaT meñ

kahāñ to aaya thā tayyārī karne mahshar kī

kahāñ maiñ phañs gayā duniyā jahāñ ke jhanjhaT meñ

vo kaalī āñkheñ vo maTkī vo reshmī āñchal

ulajh ke rah gayā dil kā qarār panghaT meñ

maiñ jang jiit ke lauTā huuñ is liye 'aḳhlāq'

sukūn baiThā huā hai mirī thakāvaT meñ

ghaTaen bandh raha tha main husn ki laT mein

pasine chhuT gae she'r ki sajawaT mein

sach ek chhoTa sa jumla tha kah diya hota

hazar lafz lage jhuT ki banawaT mein

wo kaisa daur tha hum rahaton ke hakim the

tamam raat guzarti thi ek karwaT mein

jinhon ne tash ke patton ka ghar banaya hai

dikhai deta hai tufan un ko aahaT mein

jadid nasl mein kitna utawla-pan hai

shajar lagate hi phal chahiye faTafaT mein

phir is ke ba'd kabhi pyas bujh nahin pai

kisi ne pani pilaya tha chhup ke ghunghaT mein

kahan to aaya tha tayyari karne mahshar ki

kahan main phans gaya duniya jahan ke jhanjhaT mein

wo kali aankhen wo maTki wo reshmi aanchal

ulajh ke rah gaya dil ka qarar panghaT mein

main jang jit ke lauTa hun is liye 'aKHlaq'

sukun baiTha hua hai meri thakawaT mein