ghira hun do qatilon ki zad mein wujud mera na bach sakega

ghirā huuñ do qātiloñ kī zad meñ vujūd merā na bach sakegā

maiñ zard jangal se bach gayā to pahāḌ ik mushta'il milegā

hazīmatoñ ke safar kā raahī ufuq ko dekhegā bebasī se

ufuq se baḌhtā huā samundar zamīñ ko qadmoñ se khīñch legā

jalā ke ghar se raqīb sham'eñ havā meñ ham tum nikal paḌe haiñ

yahī hai donoñ ko intizār ab ki pahle kis kā diyā bujhegā

phir ek saffāk saḳht jhoñkā barahna-tar kar gayā shajar ko

jab us ko dekhoge ḳhatm-e-shab meñ to patte patte se Dar lagegā

gudāz jismoñ kī āhaToñ kā tilism TuuTā navāh-e-jāñ meñ

fazā se ab koī haath baḌh kar ujaḌte mausam meñ aag degā

ghira hun do qatilon ki zad mein wujud mera na bach sakega

main zard jangal se bach gaya to pahaD ek mushta'il milega

hazimaton ke safar ka rahi ufuq ko dekhega bebasi se

ufuq se baDhta hua samundar zamin ko qadmon se khinch lega

jala ke ghar se raqib sham'en hawa mein hum tum nikal paDe hain

yahi hai donon ko intizar ab ki pahle kis ka diya bujhega

phir ek saffak saKHt jhonka barahna-tar kar gaya shajar ko

jab us ko dekhoge KHatm-e-shab mein to patte patte se Dar lagega

gudaz jismon ki aahaTon ka tilism TuTa nawah-e-jaan mein

faza se ab koi hath baDh kar ujaDte mausam mein aag dega