ghup andhere mein ujalon ki tarah milta hai

ghup añdhere meñ ujāloñ kī tarah miltā hai

haa.e vo ġhair jo apnoñ kī tarah miltā hai

apne rahte haiñ kināroñ kī tarah duur hī duur

ġhair ab TuuT ke maujoñ kī tarah miltā hai

kaun kahtā hai ki maiñ bhuul gayā huuñ us ko

merī āñkhoñ se jo ḳhvāboñ kī tarah miltā hai

husn is daur meñ arzāñ hai sar-e-kūcha-o-bām

ishq ab parda-nashīnoñ kī tarah miltā hai

vaqt ā.īna-e-kirdār-o-amal hai goyā

yahī dushman yahī yāroñ kī tarah miltā hai

kaise kahiye ki yahī chehra hai aslī chehra

har riyā-kār faqīroñ kī tarah miltā hai

dil jab iḳhlās kī ḳhushbū se mahak uThtā hai

lutf nekī meñ gunāhoñ kī tarah miltā hai

har talabgār ye me.ār-e-atā kyā jaane

ġham bhī is bazm meñ tohfoñ kī tarah miltā hai

na khulā 'zabt' kī uftād-tabī.at kā tilism

pārsā lagtā hai rindoñ kī tarah miltā hai

ghup andhere mein ujalon ki tarah milta hai

hae wo ghair jo apnon ki tarah milta hai

apne rahte hain kinaron ki tarah dur hi dur

ghair ab TuT ke maujon ki tarah milta hai

kaun kahta hai ki main bhul gaya hun us ko

meri aankhon se jo KHwabon ki tarah milta hai

husn is daur mein arzan hai sar-e-kucha-o-baam

ishq ab parda-nashinon ki tarah milta hai

waqt aaina-e-kirdar-o-amal hai goya

yahi dushman yahi yaron ki tarah milta hai

kaise kahiye ki yahi chehra hai asli chehra

har riya-kar faqiron ki tarah milta hai

dil jab iKHlas ki KHushbu se mahak uThta hai

lutf neki mein gunahon ki tarah milta hai

har talabgar ye mear-e-ata kya jaane

gham bhi is bazm mein tohfon ki tarah milta hai

na khula 'zabt' ki uftad-tabiat ka tilism

parsa lagta hai rindon ki tarah milta hai