ghuT ke mar jaane se pahle apni diwar-e-nafas mein dar nikalo

ghuT ke mar jaane se pahle apnī dīvār-e-nafas meñ dar nikālo

dard ke vīrāñ khañDar se manzar-e-be-nām ko bāhar nikālo

ab ye aalam hai ki har-sū māvarā-e-muntahā tak haiñ uḌāneñ

āshiyāñ to ik qafas hai bāhar aa bhī jaao bāl-o-par nikālo

ḳhud tumhāre apne zad par aa rahe haiñ itnī saffākī bhī chhoḌo

kuchh ziyāda ho gayā hai teġh-e-irshādāt se jauhar nikālo

dekh lenā maat khā jā.egā shah pā kar ye TeḌhā chalne vaalā

chaal uljhī hai koī paidal jamā.e rakkho koī ghar nikālo

āñkheñ kholo ab to mere zaḳhm-e-dil bhī mundamil hone lage haiñ

maan jaao phir koī talvār uThāo phir koī ḳhanjar nikālo

tah-nashīñ maujoñ ke pahre saḳht kar detā hai qasr-e-āb par vo

ḳhuun paanī kar ke apnā pattharoñ kī oT se gauhar nikālo

ab ḳhudā jaane kahāñ le jā ke bikhrā.e havā-e-vaqt mujh ko

aao haath apnā baḌhā kar tum bhī merī ḳhaak chuTkī-bhar nikālo

kis liye 'ramz' itnī ūñchī tum ne kar rakkhī haiñ dīvāreñ hunar kī

dekho apne sāthiyoñ ko rauzan-e-ḳhud-āgahī se sar nikālo

ghuT ke mar jaane se pahle apni diwar-e-nafas mein dar nikalo

dard ke viran khanDar se manzar-e-be-nam ko bahar nikalo

ab ye aalam hai ki har-su mawara-e-muntaha tak hain uDanen

aashiyan to ek qafas hai bahar aa bhi jao baal-o-par nikalo

KHud tumhaare apne zad par aa rahe hain itni saffaki bhi chhoDo

kuchh ziyaada ho gaya hai tegh-e-irshadat se jauhar nikalo

dekh lena mat kha jaega shah pa kar ye TeDha chalne wala

chaal uljhi hai koi paidal jamae rakkho koi ghar nikalo

aankhen kholo ab to mere zaKHm-e-dil bhi mundamil hone lage hain

man jao phir koi talwar uThao phir koi KHanjar nikalo

tah-nashin maujon ke pahre saKHt kar deta hai qasr-e-ab par wo

KHun pani kar ke apna pattharon ki oT se gauhar nikalo

ab KHuda jaane kahan le ja ke bikhrae hawa-e-waqt mujh ko

aao hath apna baDha kar tum bhi meri KHak chuTki-bhar nikalo

kis liye 'ramz' itni unchi tum ne kar rakkhi hain diwaren hunar ki

dekho apne sathiyon ko rauzan-e-KHud-agahi se sar nikalo