gili miTTi se badan bante hue umr lagi

giilī miTTī se badan bante hue umr lagī

mujh ko sahrā se chaman bante hue umr lagī

puḳhtagī fikr meñ yak-laḳht kahāñ aatī hai

merī sochoñ ko suḳhan bante hue umr lagī

ibn-e-ādam kī havas se milī sadiyoñ meñ najāt

bint-e-havvā ko dulhan bante hue umr lagī

farq hālāñki bahut thoḌā hai donoñ meñ magar

sar ke āñchal ko kafan bante hue umr lagī

ham to samjhe the vo mahkegā guloñ kī mānind

par use ġhuncha-dahan bante hue umr lagī

chand lamhoñ meñ taġhayyur ye nahīñ aayā hai

chhal ko duniyā kā chalan bante hue umr lagī

maiñ to bas itnā kahūñgā mirī māyūsī ko

'shād' aashā kī kiran bante hue umr lagī

gili miTTi se badan bante hue umr lagi

mujh ko sahra se chaman bante hue umr lagi

puKHtagi fikr mein yak-laKHt kahan aati hai

meri sochon ko suKHan bante hue umr lagi

ibn-e-adam ki hawas se mili sadiyon mein najat

bint-e-hawwa ko dulhan bante hue umr lagi

farq haalanki bahut thoDa hai donon mein magar

sar ke aanchal ko kafan bante hue umr lagi

hum to samjhe the wo mahkega gulon ki manind

par use ghuncha-dahan bante hue umr lagi

chand lamhon mein taghayyur ye nahin aaya hai

chhal ko duniya ka chalan bante hue umr lagi

main to bas itna kahunga meri mayusi ko

'shad' aasha ki kiran bante hue umr lagi