git bante hue har saz se Dar lagta hai

giit bante hue har saaz se Dar lagtā hai

ḳhāmushī ab tirī āvāz se Dar lagtā hai

pahle āġhāz thā anjām se ḳhā.if lekin

aaj anjām ko āġhāz se Dar lagtā hai

tū ne har daur meñ kī ham pe ināyat lekin

zindagī ab tire e.ajāz se Dar lagtā hai

phir kisī taaj kī zid tuul pakaḌ le na kahīñ

ghar ke har shaah ko mumtāz se Dar lagtā hai

ḳhauf aatā hai tabī.at ke khule rahne se

be-ḳhatar soch kī parvāz se Dar lagtā hai

terī har baat ke andāz nirāle haiñ 'rafī.a'

tujh se vābasta har ik raaz se Dar lagtā hai

git bante hue har saz se Dar lagta hai

KHamushi ab teri aawaz se Dar lagta hai

pahle aaghaz tha anjam se KHaif lekin

aaj anjam ko aaghaz se Dar lagta hai

tu ne har daur mein ki hum pe inayat lekin

zindagi ab tere eajaz se Dar lagta hai

phir kisi taj ki zid tul pakaD le na kahin

ghar ke har shah ko mumtaz se Dar lagta hai

KHauf aata hai tabiat ke khule rahne se

be-KHatar soch ki parwaz se Dar lagta hai

teri har baat ke andaz nirale hain 'rafia'

tujh se wabasta har ek raaz se Dar lagta hai