git KHwabon ki tarah dur se chal kar aae

giit ḳhvāboñ kī tarah duur se chal kar aa.e

raat aa.ī to ujāloñ ke payambar aa.e

ġham kī qindīl jalāo ki bahut mumkin hai

koī mehmān sar-e-shām mire ghar aa.e

apne bichhḌe hue sūraj kā ḳhayāl aate hī

sāmne vaqt ke tārīk samandar aa.e

zehn maflūj rivāyat kī thakan chehroñ par

haa.e kis shaan se mahfil meñ suḳhanvar aa.e

tanz karne mirī jaltī huī tanhā.ī par

ārzūoñ ke tarāshe hue paikar aa.e

log phirte haiñ yahāñ harf-e-malāmat kī tarah

zindagānī kā yaqīñ aa.e to kyūñkar aa.e

dil meñ is tarh ruke dard-e-vafā ke lamhe

jis tarah shahr meñ changez kā lashkar aa.e

jis taraf majma’-e-ahbāb khaḌā thā 'jāmī'

ham pe aa.e to usī samt se patthar aa.e

git KHwabon ki tarah dur se chal kar aae

raat aai to ujalon ke payambar aae

gham ki qindil jalao ki bahut mumkin hai

koi mehman sar-e-sham mere ghar aae

apne bichhDe hue suraj ka KHayal aate hi

samne waqt ke tarik samandar aae

zehn mafluj riwayat ki thakan chehron par

hae kis shan se mahfil mein suKHanwar aae

tanz karne meri jalti hui tanhai par

aarzuon ke tarashe hue paikar aae

log phirte hain yahan harf-e-malamat ki tarah

zindagani ka yaqin aae to kyunkar aae

dil mein is tarh ruke dard-e-wafa ke lamhe

jis tarah shahr mein changez ka lashkar aae

jis taraf majma’-e-ahbab khaDa tha 'jami'

hum pe aae to usi samt se patthar aae