gila-e-jaur nahin shikwa-e-bedad nahin

gila-e-jaur nahīñ shikva-e-bedād nahīñ

ham giraftār-e-balā ḳhūgar-e-fariyād nahīñ

zauq-e-parvāz hai baaqī na tamannā-e-bahār

shaad huuñ shaad ki minnat-kash-e-sayyād nahīñ

dil vahī josh vahī aur ḳhayālāt vahī

kaun kahtā hai ki zindāñ meñ ham āzād nahīñ

pās-e-ādāb-e-mohabbat hai ki ḳhāmosh huuñ maiñ

ye na samjho ki mujhe tāqat-e-faryād nahīñ

tā-kujā kashmakash-e-ranj-e-asīrī sayyād

kyā mirī qaid-e-sitam kī koī mī.ād nahīñ

dil-kashī ālam-e-ġhurbat kī na pūchho mujh se

intihā ye hai ki ab ghar bhī mujhe yaad nahīñ

hāsil-e-zīst hai qurbān-e-tajallī honā

zindagī ḳhaak hai jo ishq meñ barbād nahīñ

allah allāh ye majbūrī-e-bīmār-e-firāq

sabr kī taab nahīñ tāqat-e-faryād nahīñ

kyā huā aap kā vo 'razmī'-e-shorīda mizāj

aaj kyoñ mahfil-e-ishrat meñ vo nāshād nahīñ

gila-e-jaur nahin shikwa-e-bedad nahin

hum giraftar-e-bala KHugar-e-fariyaad nahin

zauq-e-parwaz hai baqi na tamanna-e-bahaar

shad hun shad ki minnat-kash-e-sayyaad nahin

dil wahi josh wahi aur KHayalat wahi

kaun kahta hai ki zindan mein hum aazad nahin

pas-e-adab-e-mohabbat hai ki KHamosh hun main

ye na samjho ki mujhe taqat-e-faryaad nahin

ta-kuja kashmakash-e-ranj-e-asiri sayyaad

kya meri qaid-e-sitam ki koi miad nahin

dil-kashi aalam-e-ghurbat ki na puchho mujh se

intiha ye hai ki ab ghar bhi mujhe yaad nahin

hasil-e-zist hai qurban-e-tajalli hona

zindagi KHak hai jo ishq mein barbaad nahin

allah allah ye majburi-e-bimar-e-firaq

sabr ki tab nahin taqat-e-faryaad nahin

kya hua aap ka wo 'razmi'-e-shorida mizaj

aaj kyon mahfil-e-ishrat mein wo nashad nahin