gila hai apne muqaddar ki be-hisi se hamein

gila hai apne muqaddar kī be-hisī se hameñ

aur is se baḌh ke shikāyat hai zindagī se hameñ

kabhī nigār-e-lab-e-sho.ala-vash kā zikr chalā

kabhī hisār-e-ġham-e-jāñ milā kisī se hameñ

kabhī thā qurb meñ ik iztirāb kā aalam

kabhī qarār milā terī be-ruḳhī se hameñ

kabhī malāl huā iltifāt-e-paiham se

kabhī ḳhushī thī bahut tark-e-dostī se hameñ

kabhī gumāñ ki ye duniyā hai ik fareb-e-nazar

yaqīn bhī hai ḳhudā ke vajūd hī se hameñ

hayāt-e-jehd-e-musalsal meñ kyoñ hai sargardāñ

zarā patā to chale ilm-o-āgahī se hameñ

agarche dil ko milī thī naved-e-sub.h-e-jamāl

najāt mil na sakī shab kī tīrgī se hameñ

khaḌe haiñ dasht-e-balā-ḳhez meñ barahna-pā

milā hai izn-e-safar jazba-e-ḳhudī se hameñ

'sabā' ye kaun sī manzil hai dasht-e-imkāñ meñ

na āshnā se ġharaz hai na ajnabī se hameñ

gila hai apne muqaddar ki be-hisi se hamein

aur is se baDh ke shikayat hai zindagi se hamein

kabhi nigar-e-lab-e-shoala-wash ka zikr chala

kabhi hisar-e-gham-e-jaan mila kisi se hamein

kabhi tha qurb mein ek iztirab ka aalam

kabhi qarar mila teri be-ruKHi se hamein

kabhi malal hua iltifat-e-paiham se

kabhi KHushi thi bahut tark-e-dosti se hamein

kabhi guman ki ye duniya hai ek fareb-e-nazar

yaqin bhi hai KHuda ke wajud hi se hamein

hayat-e-jehd-e-musalsal mein kyon hai sargardan

zara pata to chale ilm-o-agahi se hamein

agarche dil ko mili thi nawed-e-subh-e-jamal

najat mil na saki shab ki tirgi se hamein

khaDe hain dasht-e-bala-KHez mein barahna-pa

mila hai izn-e-safar jazba-e-KHudi se hamein

'saba' ye kaun si manzil hai dasht-e-imkan mein

na aashna se gharaz hai na ajnabi se hamein