gila hai na ab hai shikayat kisi ki

gila hai na ab hai shikāyat kisī kī

mazā de ga.ī vo nadāmat kisī kī

khapī jaatī hai phir bhī āñkhoñ meñ kyā kyā

yūhīñ sī hai gul meñ shabāhat kisī kī

qayāmat hai kis tarah bardāsht hogī

mohabbat ke badle mohabbat kisī kī

azal ibtidā hai abad intihā hai

na pūchho asīrī kī muddat kisī kī

nahīñ aur kuchh ḳhuld-o-dozaḳh kā manshā

vo duurī kisī kī ye qurbat kisī kī

nigāhoñ meñ hai zahr hoñToñ meñ amrit

hayāt-o-ajal haiñ karāmat kisī kī

ġham-o-ranj-o-hirmān-o-dard-e-judā.ī

milā ham ko kyā kyā badaulat kisī kī

kaleje se kyūñkar lagā.e na rakkhūñ

fishānī hai dāġh-e-mohabbat kisī kī

adāoñ ne maarā huā naam ajal kā

hai tohmat kisī par sharārat kisī kī

har ik baar man man ke vo rūThte haiñ

bigaḌtī hai ban ban ke qismat kisī kī

shikast-e-ḳhudī kā suhānā vo naġhma

vo uzr-e-taġhāful meñ luknat kisī kī

judā.ī ko muddat huī phir bhī ab tak

nigāhoñ meñ phirtī hai sūrat kisī kī

gila hai na ab hai shikayat kisi ki

maza de gai wo nadamat kisi ki

khapi jati hai phir bhi aankhon mein kya kya

yuhin si hai gul mein shabahat kisi ki

qayamat hai kis tarah bardasht hogi

mohabbat ke badle mohabbat kisi ki

azal ibtida hai abad intiha hai

na puchho asiri ki muddat kisi ki

nahin aur kuchh KHuld-o-dozaKH ka mansha

wo duri kisi ki ye qurbat kisi ki

nigahon mein hai zahr honTon mein amrit

hayat-o-ajal hain karamat kisi ki

gham-o-ranj-o-hirman-o-dard-e-judai

mila hum ko kya kya badaulat kisi ki

kaleje se kyunkar lagae na rakkhun

fishani hai dagh-e-mohabbat kisi ki

adaon ne mara hua nam ajal ka

hai tohmat kisi par shararat kisi ki

har ek bar man man ke wo ruThte hain

bigaDti hai ban ban ke qismat kisi ki

shikast-e-KHudi ka suhana wo naghma

wo uzr-e-taghaful mein luknat kisi ki

judai ko muddat hui phir bhi ab tak

nigahon mein phirti hai surat kisi ki