gila kuchh un se na unki jafa-taraazi se

gila kuchh un se na un kī jafā-tarāzī se

milā huuñ ḳhaak meñ yāroñ kī chārasāzī se

maiñ kam nahīñ kisī saa.im kisī namāzī se

ki mai-kade meñ guzartī hai pāk-bāzī se

zabāñ muñh meñ mire dī hai gāliyāñ de kar

ḳhajil haiñ dil meñ kuchh apnī zabāñ-darāzī se

tum āsmān bane ho satā satā ke mujhe

bulandī naam huā hai jafā-tarāzī se

na pūchhte mire dil ko na haath se jaatā

gila hai mujh ko faqat un kī dil-navāzī se

butoñ kī sajda-guzārī kā Dhab na thā ma.alūm

salīqa ham ne ye sīkhā baḌe namāzī se

Daregī tum se qayāmat ajī ma.āz-allāh

dikhā do aañkh ki ruk jaa.e fitna-sāzī se

nazar na Daal mire be-shumār jurmoñ par

ba.iid kyā hai tirī shān-e-be-niyāzī se

kahīñ se sub.h-e-qayāmat ubhar nahīñ saktī

burī dabī hai shab-e-hijr kī darāzī se

ye kyā sitam hai kisī tarah tum nahīñ milte

milo na dil se milo to zamāna-sāzī se

butoñ se pahle irādat thī ka.aba vāloñ ko

binā-e-ishq-e-haqīqī paḌī majāzī se

hai āsmāñ ko bhī gardish zamīñ ko bhī chakkar

bachā na koī tumhārī nishāne-bāzī se

sharāb-ḳhāne meñ jā baiThe do ghaḌī ke liye

milī bhī ham ko jo fursat qimār-bāzī se

mile the kal hameñ maiḳhāne meñ vahī 'safdar'

liye jo sub.ha nazar aate haiñ namāzī se

gila kuchh un se na un ki jafa-taraazi se

mila hun KHak mein yaron ki chaarasazi se

main kam nahin kisi saim kisi namazi se

ki mai-kade mein guzarti hai pak-bazi se

zaban munh mein mere di hai galiyan de kar

KHajil hain dil mein kuchh apni zaban-daraazi se

tum aasman bane ho sata sata ke mujhe

bulandi nam hua hai jafa-taraazi se

na puchhte mere dil ko na hath se jata

gila hai mujh ko faqat un ki dil-nawazi se

buton ki sajda-guzari ka Dhab na tha malum

saliqa hum ne ye sikha baDe namazi se

Daregi tum se qayamat aji maaz-allah

dikha do aankh ki ruk jae fitna-sazi se

nazar na Dal mere be-shumar jurmon par

baid kya hai teri shan-e-be-niyazi se

kahin se subh-e-qayamat ubhar nahin sakti

buri dabi hai shab-e-hijr ki daraazi se

ye kya sitam hai kisi tarah tum nahin milte

milo na dil se milo to zamana-sazi se

buton se pahle iradat thi kaba walon ko

bina-e-ishq-e-haqiqi paDi majazi se

hai aasman ko bhi gardish zamin ko bhi chakkar

bacha na koi tumhaari nishane-bazi se

sharab-KHane mein ja baiThe do ghaDi ke liye

mili bhi hum ko jo fursat qimar-bazi se

mile the kal hamein maiKHane mein wahi 'safdar'

liye jo subha nazar aate hain namazi se