gila nahin ki muKhaalif mera zamana hua

gila nahīñ ki muḳhālif mirā zamāna huā

maiñ ḳhud hī chhoḌ ke kār-e-jahāñ ravāna huā

maiñ ab chalā ki mirā qāfila ravāna huā

kabhī phir ā.ūñgā vāpas jo āb-o-dāna huā

maiñ bil-mushāfa nahīñ jāntā kisī ko yahāñ

ki mujh se merā ta.āruf bhī ġhā.ebāna huā

havā-e-gul bhī na pairoñ kī ban sakī zanjīr

bahār meñ bhī na ab ke koī divāna huā

jo reg zer-e-qadam aa.ī ban ga.ī sabza

ġhubār sar pe jo aayā to shāmiyāna huā

kisī ko nok-e-sināñ bhī zamīr kī na chubhī

kisī ko ek ishāra hī tāziyāna huā

zamāna khiñch ke na kyuuñ us ke paas jā.egā

vo ālī-jāh huā sāhib-e-ḳhazāna huā

baras rahī hai mirī chashm-e-nam to barsoñ se

tahī na abr-e-guhar-bār kā ḳhazāna huā

nazar meñ sab kā ye manzar sameT lo 'mohsin'

sahar qarīb hai ab ḳhatm ye fasāna huā

gila nahin ki muKHalif mera zamana hua

main KHud hi chhoD ke kar-e-jahan rawana hua

main ab chala ki mera qafila rawana hua

kabhi phir aaunga wapas jo aab-o-dana hua

main bil-mushafa nahin jaanta kisi ko yahan

ki mujh se mera taaruf bhi ghaebana hua

hawa-e-gul bhi na pairon ki ban saki zanjir

bahaar mein bhi na ab ke koi diwana hua

jo reg zer-e-qadam aai ban gai sabza

ghubar sar pe jo aaya to shamiyana hua

kisi ko nok-e-sinan bhi zamir ki na chubhi

kisi ko ek ishaara hi taziyana hua

zamana khinch ke na kyun us ke pas jaega

wo aali-jah hua sahib-e-KHazana hua

baras rahi hai meri chashm-e-nam to barson se

tahi na abr-e-guhar-bar ka KHazana hua

nazar mein sab ka ye manzar sameT lo 'mohsin'

sahar qarib hai ab KHatm ye fasana hua