gila tera karun main be wafa kya

gila terā karūñ maiñ be vafā kyā

tū merā kyā kisī kā bhī huā kyā

añdherā sā mujhe kyoñ lag rahā hai

charāġh-e-ārzū-e-dil bujhā kyā

rahī duniyā to mujh se duur lekin

sharīk-e-ġham mirā tū bhī huā kyā

kisī se kyoñ maiñ sharmā.ūñ jahāñ meñ

kabhī dast-e-talab merā baḌhā kyā

bahār-e-nau sabhī lā.eñge mil kar

shagūfe kyā anādil kyā sabā kyā

jo harakat husn kī hotī hai mub.ham

usī ko log kahte haiñ adā kyā

agar hai ibtidā sab kī musallam

to phir lā intihā kī ibtidā kyā

gila tera karun main be wafa kya

tu mera kya kisi ka bhi hua kya

andhera sa mujhe kyon lag raha hai

charagh-e-arzu-e-dil bujha kya

rahi duniya to mujh se dur lekin

sharik-e-gham mera tu bhi hua kya

kisi se kyon main sharmaun jahan mein

kabhi dast-e-talab mera baDha kya

bahaar-e-nau sabhi laenge mil kar

shagufe kya anadil kya saba kya

jo harakat husn ki hoti hai mubham

usi ko log kahte hain ada kya

agar hai ibtida sab ki musallam

to phir la intiha ki ibtida kya