gila nahin ki kinaron ne sath chhoD diya

gilā nahīñ ki kināroñ ne saath chhoḌ diyā

mire safīne kā dhāroñ ne saath chhoḌ diyā

rah-e-hayāt meñ manzil kā aasrā kaisā

qadam qadam pe ġhubāroñ ne saath chhoḌ diyā

har ek ruḳh se sajā hotā zindagī ko magar

maiñ kyā karūñ ki bahāroñ ne saath chhoḌ diyā

udaas dil ne agar giit gungunāyā bhī

shikasta-sāz ke tāroñ ne saath chhoḌ diyā

sulag rahī hai abhī tak vo aag siine meñ

lagā ke jis ko sharāroñ ne saath chhoḌ diyā

nazar-navāz mazāq-e-nazar na 'zeb' huā

tire latīf ishāroñ ne saath chhoḌ diyā

gila nahin ki kinaron ne sath chhoD diya

mere safine ka dhaaron ne sath chhoD diya

rah-e-hayat mein manzil ka aasra kaisa

qadam qadam pe ghubaron ne sath chhoD diya

har ek ruKH se saja hota zindagi ko magar

main kya karun ki bahaaron ne sath chhoD diya

udas dil ne agar git gungunaya bhi

shikasta-saz ke taron ne sath chhoD diya

sulag rahi hai abhi tak wo aag sine mein

laga ke jis ko shararon ne sath chhoD diya

nazar-nawaz mazaq-e-nazar na 'zeb' hua

tere latif ishaaron ne sath chhoD diya