gir paDa hun to qarib aa ke uTha lo mujhko

gir paḌā huuñ to qarīb aa ke uThā lo mujh ko

maiñ bahar-hāl huuñ insān sa.mbhālo mujh ko

bārish-e-sang-e-malāmat hai har ik jānib se

aa.ina huuñ maiñ tumhārā hī bachā lo mujh ko

dhuup hai ġham kī bahut tez jalā jaatā huuñ

chhāñv meñ apnī mohabbat kī biThā lo mujh ko

birhā kā giit huuñ mazlūm kī āvāz huuñ maiñ

tum jo chāho to hasīñ naġhma banā lo mujh ko

maiñ diyā huuñ ki nahīñ mahloñ meñ jalne ke liye

ho añdherā jo kisī ghar meñ jalā lo mujh ko

maiñ vafā-kesh huuñ sahrā ho ki maqtal ho 'payām'

de ke āvāz jahāñ chāho bulā lo mujh ko

gir paDa hun to qarib aa ke uTha lo mujh ko

main bahar-haal hun insan sambhaalo mujh ko

barish-e-sang-e-malamat hai har ek jaanib se

aaina hun main tumhaara hi bacha lo mujh ko

dhup hai gham ki bahut tez jala jata hun

chhanw mein apni mohabbat ki biTha lo mujh ko

birha ka git hun mazlum ki aawaz hun main

tum jo chaho to hasin naghma bana lo mujh ko

main diya hun ki nahin mahlon mein jalne ke liye

ho andhera jo kisi ghar mein jala lo mujh ko

main wafa-kesh hun sahra ho ki maqtal ho 'payam'

de ke aawaz jahan chaho bula lo mujh ko