girte girte sambhal raha hun main

girte girte sambhal rahā huuñ maiñ

dastaras se nikal rahā huuñ maiñ

dhuup kā bhī ajab tamāsha hai

apne saa.e pe chal rahā huuñ maiñ

guftugū hai merī gulāboñ sī

shaḳhsiyat meñ kañval rahā huuñ maiñ

dhuup jab se malī hai chehre par

rafta rafta pighal rahā huuñ maiñ

gird mere hai vahshatoñ kā hujūm

ek jañgal meñ pal rahā huuñ maiñ

ek hichkī kā khel hai 'māhir'

is qadar kyuuñ machal rahā huuñ maiñ

girte girte sambhal raha hun main

dastaras se nikal raha hun main

dhup ka bhi ajab tamasha hai

apne sae pe chal raha hun main

guftugu hai meri gulabon si

shaKHsiyat mein kanwal raha hun main

dhup jab se mali hai chehre par

rafta rafta pighal raha hun main

gird mere hai wahshaton ka hujum

ek jangal mein pal raha hun main

ek hichki ka khel hai 'mahir'

is qadar kyun machal raha hun main