girya-e-shab mujhe shab-bhar ko jagata bhi nahin

girya-e-shab mujhe shab-bhar ko jagātā bhī nahīñ

aur vo hai ki mire ḳhvāb meñ aatā bhī nahīñ

itnā saudā bhī nahīñ hai ki dar-e-sang pe jaa.eñ

bār-e-sar hai ki mirā shāna uThātā bhī nahīñ

dil-e-vīrāñ ko kahā us ne lagā kar Thokar

ab koī aisī jagah ḳhaak uḌātā bhī nahīñ

itnī fursat hī kahāñ us ko mujhe ḳhaak kare

aur phir barq se merā koī naatā bhī nahīñ

kahnā hotā hai jo sab kah bhī vo detā hai magar

apne she'roñ meñ mirā zikr vo laatā bhī nahīñ

us ko mā'lūm hai ashkoñ kī tapish kā 'ālam

is liye mujh ko nigāhoñ se girātā bhī nahīñ

girya-e-shab mujhe shab-bhar ko jagata bhi nahin

aur wo hai ki mere KHwab mein aata bhi nahin

itna sauda bhi nahin hai ki dar-e-sang pe jaen

bar-e-sar hai ki mera shana uThata bhi nahin

dil-e-viran ko kaha us ne laga kar Thokar

ab koi aisi jagah KHak uData bhi nahin

itni fursat hi kahan us ko mujhe KHak kare

aur phir barq se mera koi nata bhi nahin

kahna hota hai jo sab kah bhi wo deta hai magar

apne she'ron mein mera zikr wo lata bhi nahin

us ko ma'lum hai ashkon ki tapish ka 'alam

is liye mujh ko nigahon se giraata bhi nahin