girya na ho sakega tere rahguzar mein

girya na ho sakegā tire rahguzār meñ

ab jaan hī nahīñ hai tire sogvār meñ

haamī zamīn kā hai nazar āsmāñ pe hai

kuchh to ġhurūr sā hai tire inkisār meñ

mat pūchh haa.e umr vo kitnī darāz thī

ham ne guzār dī jo tire intizār meñ

saare jahāñ ne us ko batāyā thā bevafā

phir bhī kamī na aa.ī mire e.atibār meñ

tū thā ke jā milā thā raqīboñ se aur ham

tujh ko talāshte rahe har ġham-gusār meñ

hamvār koī sang tarāzū na kar sakā

laayā gayā jo dard hamārā shumār meñ

ro luuñ abhī ki mohlat-e-ġham de rahā hai dil

kal ye bhī phir rahe na mire iḳhtiyār meñ

do-gām chal ke saath mire tū ba-qadr-e-shauq

paidā na kar umiid dil-e-be-qarār meñ

kab se uThā rahā hai ziyāñ par ziyāñ ġharīb

dil ko lagā diyā hai ye kis kārobār meñ

imdād ko na aa.e vo un kī ḳhatā nahīñ

āvāz hī nahīñ thī hamārī pukār meñ

girya na ho sakega tere rahguzar mein

ab jaan hi nahin hai tere sogwar mein

hami zamin ka hai nazar aasman pe hai

kuchh to ghurur sa hai tere inkisar mein

mat puchh hae umr wo kitni daraaz thi

hum ne guzar di jo tere intizar mein

sare jahan ne us ko bataya tha bewafa

phir bhi kami na aai mere eatibar mein

tu tha ke ja mila tha raqibon se aur hum

tujh ko talashte rahe har gham-gusar mein

hamwar koi sang taraazu na kar saka

laya gaya jo dard hamara shumar mein

ro lun abhi ki mohlat-e-gham de raha hai dil

kal ye bhi phir rahe na mere iKHtiyar mein

do-gam chal ke sath mere tu ba-qadr-e-shauq

paida na kar umid dil-e-be-qarar mein

kab se uTha raha hai ziyan par ziyan gharib

dil ko laga diya hai ye kis karobar mein

imdad ko na aae wo un ki KHata nahin

aawaz hi nahin thi hamari pukar mein